Qriplə allergiyanın fərqi nədir? – Həkimdən AÇIQLAMA

TİBB

480

11.03.2026, 21:12

Yaz ayları allergiyadan əziyyət çəkənlərin üçün bir çox narahatlıqlarla keçir. Çox vaxt allergiya burun axması, çoxlu asqırma və göz qaşınması kimi əlamətlərlə müşahidə edildiyinə görə qripə bənzəyir. Lakin allergiya fərqli xüsusiyyətə malikdir. Məsələn, qida allergiyası zamanı buna səbəb olan qida məhsulu rasiondan çıxarılandan sonra şikayətlər aradan qalxır. Ağacların çiçəkləməsi, təbiətdə gedən tozlanma prosesinə qarşı allergiyası olanların işi isə daha çətin olur.

Bəzən allergiya ilə qripi dəyişik salanlar da olur. Lakin bu iki xəstəlik arasında fərqlər var.

Qriplə allergiya arasında fərqlər barədə Oxu24.com-a açıqlama verən allerqoloq-həkim Şahvələd Məmmədov bildirib ki, qrip xəstəliyi zamanı bədən ağrıları daha ön planda olduğu halda, allergiyada belə olmur:

“Allergiyada qriplə müqayisədə asqırmalar daha tez-tez olur. Allergiya ilə əlaqədar xəstəliklərdə qızdırma halları da o qədər müşahidə edilmir. Bədəndə ağrıların və qızdırma hallarının ön planda olması daha çox virus mənşəli, yaxud digər respirator xəstəliklə əlaqədardır”.

Həkimlərin sözlərinə görə, yaz mövsümündə görünən allergik reaksiyalar mart ayından başlayaraq iyun ayına qədər davam edə bilir:

“Proses ağacların, çiçəklərin, otların, taxıl bitkilərinin çiçəklənmə dövrünü əhatə edir. Bu dövrlə əlaqədar olaraq bitkilərdə tozlanma müşahidə olunur, tozcuqlar ətraf mühitə saçılır və ona qarşı reaksiyalar başlayır. Həmin dövrdə allergik rinit, üst tənəffüs yollarının allergiyası, bonxial astmadan əziyyət çəkənlərin şikayətlərində artımlar qeydə alınır”.

Yeganə

Həmçinin oxuyun