Ermənistan anklav kəndlərin qarşılığında Başkəndi istəyir: Bakının seçimi nə olacaq? - Politoloqdan AÇIQLAMA  

Azərbaycanla Ermənistan arasında sərhədlərin delimitasiyası prosesi intensiv şəkildə davam edir və tərəflər arasında müxtəlif həll yolları müzakirə olunur. Son dövrlərdə əsas müzakirə mövzularından biri də anklav kəndlərin taleyi və onların qarşılıqlı qaytarılması məsələsidir. Məlum olduğu kimi, Azərbaycanın bir sıra anklav kəndləri hələ də Ermənistan ərazisində qalmaqdadır. İctimaiyyətdə və ekspert dairələrində Ermənistanın anklav kəndlərin qarşılığında Azərbaycan ərazisindəki Başkəndi tələb etməsi ilə bağlı müxtəlif fikirlər səsləndirilir. Bu fonda rəsmi Bakının seçə biləcəyi variantlar və prosesin gedişatı cəmiyyətin diqqət mərkəzindədir. Mövzu ilə bağlı Oxu24.com saytına açıqlama verən politoloq Elşad Həsənov vacib məqamlara toxunub.

Elşad Həsənov bildirib ki, Azərbaycan torpaqları işğal altında olan zaman Azərbaycanın 8 kəndi də müharibədən sonra onların nəzarəti altında qaldı. Azərbaycanla Ermənistan arasında sərhədlərin delimitasiyası komissiyasının 2024-cü il 19 aprel tarixində əldə olunan razılaşma əsasında Qazax istiqamətində Bağanis Ayrım, Aşağı Əskipara, Xeyrimli və Qızılhacılı kəndləri Azərbaycana qaytarıldı:

“Ancaq anklav kəndlər – Yuxarı Əskipara, Sofulu Ermənistan ərazisində qaldı, həm də xatırladaq ki, Naxçıvan Muxtar Respublikasının Sədərək rayonunun Kərki kəndi də anklav kənd olaraq hələlik Ermənistan tabeçiliyindədir”.

Onun sözlərinə görə, bu komissiyalar iş aparır, müvafiq işlər görülür:

“İndi Ermənistanın bizim ərazimizdə bir anklav kəndi var – Başkənd. Bu Başkənd sərhəddən 18 kilometr içəri, yəni Ermənistan-Azərbaycan sərhədindən 18 kilometr içəridə, Gədəbəy rayonunun ərazisində yerləşir və ümumi ərazisi 40 kvadrat kilometrdir. Həmin kənd uğrunda da ermənilər 1992-ci ilin avqustunda silahlı qüvvələri ilə hücuma keçdilər, Gədəbəyin bir neçə kəndini işğal edib həmin anklavla birləşmək istədilər”.

Politoloq qeyd edib ki, Azərbaycan ordusu iki günlük müharibə nəticəsində Ermənistan silahlı qüvvələrini vurub ordan çıxara bildi və həmin kəndi də öz nəzarətinə aldı. Bu, 6-8 avqust 1992-ci ildə baş verdi:

“İndi isə bizim 4 anklav kəndimiz Ermənistan ərazisindədir, onlarınsa 1 kəndi bizim ərazimizdədir. Təbii ki, bunlar da artıq müharibə bitib, diplomatik yollarla məsələlər həll olunur. Apardığımız işlər sayəsində Qazaxın kəndləri qaytarıldı və o biri kəndlərin də qaytarılması haqqında danışıqlar gedir”.

Bütün bunların komissiyaların razılığı ilə həll olunacağını vurğulayan Elşad Həsənov hesab edir ki, Başkənd məsələsi hansısa kəndin anklav kəndlə dəyişdirilə bilər:

“Bu məsələlərdə hesab etmirəm ki, ermənilər gəlib indi təkrar Başkənddə yaşamalıdırlar. Bəli, buna biz razıyıq, gəlsinlər, ancaq bu, alınan məsələ deyil.

Ona görə də düşünürəm ki, ən yaxşı variant odur ki, onlar torpağı – həmin anklav kəndləri arasında razılığa gəlsinlər. Yəni Başkənd qalır Azərbaycan ərazisində, bizim də hər hansı bir kəndimiz, anklavda dərinlikdə olan kəndimiz onlar ilə mübadilə edilə bilər. Başqa burda müharibə və digər məsələlər olası deyil”.

Çimnaz Telmanqızı

Həmçinin oxuyun

DİN müraciət YAYDI

Yeni postlar, yeni adlar: Prezident kimlərə vəzifə verib? 

Sərəncam İMZALANDI: Babayev vəzifəsindən azad edilib

Arzumu həbsdən buraxan hakimin maraqlı DOSYESİ