Vüqar Bayramov: Ermənistanın enerji təhlükəsizliyi Azərbaycandan keçir

Nikol Paşinyan Avropa Komissiyasının sədri Ursula Fon der Leyenlə birgə mətbuat konfransında regionda kommunikasiyaların açılması çərçivəsində Azərbaycan və Türkiyə ilə enerji əlaqələrinin inkişaf etdirilməsinin vacibliyini vurğulayıb. Ermənistan baş nazirinin sözlərinə görə, bu ölkələrlə elektrik verilişi xətlərinin çəkilməsi və inteqrasiyası həm Ermənistanın enerji təhlükəsizliyinə, həm də "yaşıl keçid" prosesinə mühüm töhfə verəcək. Bu bəyanat regionda yeni iqtisadi əməkdaşlıq formatlarının formalaşması baxımından ciddi rezonans doğurub. 

Mövzu ilə bağlı Oxu24.com-a açıqlama verən Milli Məclisin deputatı, tanınmış iqtisadçı-ekspert Vüqar Bayramov bildirib ki, Azərbaycan regionun enerji təhlükəsizliyinə hər zaman töhfə verən dövlətdir.

“Ermənistan enerjidə asılılığı minimuma endirmək istəyir"

Millət vəkili qeyd edib ki, rəsmi İrəvanın son açıqlamaları Ermənistanın enerji təhlükəsizliyi baxımından həm şimaldan, həm də cənubdan olan asılılığını minimumlaşdırmaq məqsədi daşıyır:"Nəzərə alsaq ki, hazırda Azərbaycan 16 ölkəyə təbii qaz nəql edir, onlardan 12-si Avropada, 10-u isə Avropa İttifaqında yerləşir. Təbii ki, Azərbaycan eyni zamanda Ermənistana da yanacaq məhsulları ixrac edir. Praktik olaraq, Azərbaycan və Ermənistan arasında təxminən 40 ilə yaxın müddətdən sonra ilk ticarət əlaqələri məhz Azərbaycan yanacaq məhsullarının Ermənistan bazarına daxil olması ilə başladı. Ermənistan hazırda əsasən enerji məhsullarını Rusiya və İrandan alır. Azərbaycanın yanacaq məhsullarının idxalına isə ötən ildən etibarən başlanılıb. Ermənistan üçün enerji təhlükəsizliyi baxımından Azərbaycan və Türkiyə ilə əməkdaşlıq olduqca vacibdir”.

Vüqar Bayramov vurğulayıb ki, Azərbaycan regionda təhlükəsizliyə töhfə vermək gündəliyinə hər zaman sadiqdir və Azərbaycan üzərindən Ermənistana daşınan yüklərlə bağlı məhdudiyyətlərin aradan qaldırılması da məhz bu məqsədi güdür:"Bütövlükdə, xüsusən də Azərbaycanla Ermənistan arasındakı sülh danışıqları, həmçinin Ermənistan-Türkiyə normallaşma prosesi nəticə etibarilə sülh müqaviləsinin bağlanmasına gətirib çıxararsa, bu, regionda əməkdaşlığın daha da güclənməsinə şərait yaradacaq”.

Onun sözlərinə görə, qiymətləndirmələr göstərir ki, 38 məhsul üzrə Ermənistan və Azərbaycanın qarşılıqlı xarici ticarət əlaqələri qurmaq imkanı var. Hər iki ölkə bu məhsullar üzrə müqayisəli üstünlüyə malikdir ki, bu da il ərzində təxminən 300 milyon dollarlıq ticarət dövriyyəsi deməkdir:“Ona görə də, Ermənistan konstitusiyasına düzəlişlər nə qədər tez edilərsə, sülh müqaviləsi nə qədər tez bağlanarsa, regionda iqtisadi əməkdaşlıq və dayanıqlı sülh üçün imkanlar bir o qədər genişlənəcək”,-deyə deputat bildirib. 

Çimnaz Telmanqızı

Həmçinin oxuyun

TƏCİLİ!Həmin şəxs tutularaq Azərbaycana gətirilir

XƏBƏRDARLIQ: yağış yağacaq, şimşək çaxacaq 

Artan pensiyalarla bağlı AÇIQLAMA

Bu rayonlardan Bakıya gələnlərə pis xəbər — Qadağa qoyula bilər