Qarabağ  Müharibəsi qazisi, ikinci  qrup  Qarabağ  əlili   Həsənov  Bəymirzə  Gülmirzə  oğlu  illərdir   Dövlət tərəfindən ona  veriləcək  mənzilini   ala  bilməməsi barədə məlumat vermişdik.

 

Oxu24.com xəbər verir ki, qeyd olunan müraciətə rəsmi olaraq münasibət bildirilib.

 

Əmək və Əhalinin Sosial Müdafiəsi Nazirliyinin tabeliyində Sosial Xidmətlər Agentliyinin mətbuat katibi Murad Həşimov sorğumuza cavab olaraq bildirib ki, Həsənov Bəymirzə Gülmirzə oğlu ölkəmizin ərazi bütövlüyünün müdafiəsi ilə  əlaqədar ikinci dərəcə əlilliyi olan şəxs kimi aylıq  763,87 manat sosial ödənişlə (o cümlədən Prezidentin aylıq təqaüdü olaraq 400 manat və əlilliyə görə pensiya olaraq 363,87 manat) təmin edilir. 

 

 

(Fotoda - Murad Həşimov)

 

Həmçinin ona əlillik təyin edildiyi dövrdə (2004-cü ildə) müharibə ilə əlaqədar əlilliyə görə birdəfəlik sığorta ödənişi edilib. 

 

Mənzil növbəsində olsa da, ona mənzil təqdim edilmədiyini bildirən B.Həsənova əslində ailə tərkibi və Bakı şəhərində qeydiyyatda olduğu nəzərə alınmaqla son illərdə  Bakının Xocəsən qəsəbəsində yeni yaşayış kompleksindən 1 otaqlı mənzil təklif edilib. Lakin o bu təklifdən imtina edib. 

 

Bununla belə, qarşıdakı dövrdə ona növbəti dəfə mənzil təklif edilməsi nəzərdə tutulub.  

 

B.Həsənovun avtomobillə təminatı məsələsinə gəldikdə isə, bunun üçün nəqliyyat vasitəsinə tibbi göstərişinin müəyyən edilməsi məqsədilə onun müraciəti əsasında  tibb müəssisəsi tərəfindən “Əlillik” altsisteminə göndəriş daxil edilməlidir. 

 

Ötən dövrdə B.Həsənovla bağlı e-sistemə həmin göndəriş  daxil edilməyib və o, hazırda avtomobil növbəsində qeydiyyatda deyil.

 

Oxu24.com məsələni diqqətdə saxlayacaq.

 

Miri Məcidli

 

Oxu24.com