Kosmik gəmi qəbiristanlığı: Nemo nöqtəsinin sirri

Yer kürəsində elə bir coğrafi məkan var ki, orada dayansanız, sizə ən yaxın insanlar quruda deyil, məhz kosmosda – orbitdə dövr edən astronavtlar olacaq. Sakit okeanın tam mərkəzində yerləşən və qurudan ən uzaq məsafədə qərarlaşan bu ərazi “Nemo nöqtəsi" adlanır.

Oxu24.com xəbər verir ki, bəzi alimlər buradakı mühiti Mars planetinin şəraitinə bənzədirlər.

Nemo nöqtəsi ən yaxın üç adadan təxminən 2685 kilometr uzaqlıqdadır. Bu nəhəng uzaqlıq səbəbindən ərazidə hər hansı bir ölkənin limanı, yaşayış məskəni və ya daimi insan fəaliyyəti mövcud deyil. Latınca mənası "heç kim" olan "Nemo" adı həm buranın kimsəsizliyinə, həm də məşhur kapitan Nemo obrazına bir işarədir. Maraqlıdır ki, bu məkanda okeanın dərin qatlarından qida maddələrini səthə çıxaran axınlar zəif olduğundan, balıqların və digər dəniz canlılarının sayı olduqca azdır. Bu səbəbdən bəzi elm adamları bu sakitliyi "Yer üzünün sonsuzluğu" adlandırırlar.

Ərazinin insan məskənlərindən tamamilə təcrid olunması onu kosmik agentliklər üçün ideal bir "tullantı poliqonuna" çevrib. İstismar müddəti bitən süni peyklər, yük gəmiləri və kosmik stansiya hissələri yerə qaytarılarkən məhz Nemo nöqtəsinə istiqamətləndirilir. Çünki burada kosmik qalıqların insan yaşayan ərazilərə düşərək zərər vurma ehtimalı demək olar ki, yoxdur. 1971-ci ildən bəri əraziyə 300-dən çox kosmik aparatın qalıqları düşüb və bu səbəbdən bura həm də "Kosmik gəmi qəbiristanlığı" kimi tanınır.

Nemo nöqtəsi həm də uzun illər sirri açılmayan qəribə sualtı səslərlə dünya elmini təəccübləndirib. 1997-ci ildə okeanın dərinliklərində qeydə alınan və “Bloop" adlandırılan çox güclü səs, ilk vaxtlar nəhəng və naməlum bir dəniz canlısına aid edilsə də, sonrakı araşdırmalar bu sirri çözüb. Məlum olub ki, bu vahiməli səs əslində nəhəng buzlaqların qırılması nəticəsində yaranıb.

Dünyanın ən sirli, ən tənha və kosmosla birbaşa bağları olan bu coğrafi nöqtəsi, dənizin altındakı texnoloji tarixi ilə bəşəriyyəti heyran qoymağa davam edir.

Həmçinin oxuyun

“Şuşanın hər daşı tarixi mühitin bir hissəsidir” – Deputatdan vandalizmə qarşı SƏRT ÇAĞIRIŞ  

Prezidentdən yeni təyinat

Prezident onu vəzifədən azad etdi

Nazirlik şad xəbəri elan etdi: 300 manat/ha artıq ödəniləcək