Səhnəyə çıxmaq üçün adını dəyişən aktrisanın maraqlı həyat hekayəsi

MARAQLI

478

07.07.2026, 11:05

Azərbaycan teatr və kino tarixində özünəməxsus yeri olan, yaratdığı yaddaqalan obrazlarla milyonlarla tamaşaçının sevgisini qazanan aktrisalardan biri də Süsən Məcidova olub. O, əsas rollardan çox, canlandırdığı epizodik obrazlarla yaddaşlara həkk olunmağı bacarıb. Hətta bir neçə dəqiqəlik görünüşü belə tamaşaçıların yaddaşında uzun illər yaşayırdı. Lakin onun həyat yolu heç də asan olmayıb.

Oxu24.com-un məlumatına görə, Süsən Məcidova 1916-cı ildə Bakıda anadan olub. Maddi imkanların məhdudluğu səbəbindən cəmi dörd sinif təhsil ala bilib. Buna baxmayaraq, incəsənətə olan böyük sevgisi onu çox gənc yaşlarından səhnəyə gətirib. İlk dəfə 1929-cu ildə dram dərnəyində çıxış edən gələcəyin tanınmış aktrisası qısa müddət sonra Türk İşçi Teatrının tamaşalarında kütləvi səhnələrdə iştirak etməyə başlayıb. Əvvəlcə kiçik epizodlarla çıxış etsə də, istedadı sayəsində 1933-cü ildən teatrın aktyor truppasına qəbul olunub və ömrünün sonuna qədər həmin səhnəyə sadiq qalıb.Onun həyatının ən maraqlı məqamlarından biri isə adını dəyişməsi ilə bağlıdır. XX əsrin 30-cu illərində qadınların səhnəyə çıxması cəmiyyət tərəfindən birmənalı qarşılanmırdı. Aktrisalar tez-tez qınaq obyektinə çevrilirdilər. Məhz bu səbəbdən Məcidova uzun müddət özünü insanlara fərqli adla təqdim edib. O, ətrafdakılar onu başqa millətin nümayəndəsi hesab edib daha az qınasınlar deyə “Susan” adından istifadə edirdi. Sonralar cəmiyyət milli aktrisaları qəbul etməyə başladıqdan sonra artıq öz həqiqi adı – Süsən Məcidova ilə fəaliyyətini davam etdirib.Bu fakt onun sənət uğrunda hansı çətinliklərdən keçdiyini, dövrün sosial təzyiqlərinə baxmayaraq səhnədən ayrılmadığını göstərən ən təsirli nümunələrdən biridir.

İllər keçdikcə Süsən Məcidova Azərbaycan teatrının ən parlaq simalarından birinə çevrildi. Onun güclü səhnə temperamenti, təbii yumoru, canlı mimikası və realist oyun tərzi həm rejissorların, həm də tamaşaçıların diqqətini cəlb edirdi. O, komik obrazlarda olduğu qədər dramatik və romantik xarakterlərin ifasında da yüksək peşəkarlıq nümayiş etdirirdi. Qrotesk üslublu rollar isə onun yaradıcılığında xüsusi yer tuturdu.Əməkdar artist fəxri adına 17 iyun 1943-cü ildə layiq görülən aktrisa uzun illər ərzində teatr səhnəsində yüzdən artıq obraz yaradıb. Onun ifa etdiyi Yetər, Nərgiz, Qaraca qız, Şərəbanı, Səkinə xala, Dayə, Həlimə, Nabat, Şaban nənə və digər obrazlar Azərbaycan teatr tarixinin qiymətli səhifələrinə çevrilib.Süsən Məcidovanın şöhrəti təkcə teatrla məhdudlaşmayıb. O, Azərbaycan kinosunun qızıl fonduna daxil olan onlarla filmdə də maraqlı obrazlar yaradıb. “Bəxtiyar”, “Görüş”, “Bizim Cəbiş müəllim”, “Şərikli çörək”, “Yeddi oğul istərəm”, “Qayınana”, “Qorxma, mən səninləyəm”, “Tütək səsi”, “Alma almaya bənzər”, “Köhnə bərə”, “Bir cənub şəhərində”, “Telefonçu qız”, “Sən niyə susursan?”, “Gün keçdi”, “Var olun, qızlar...”, “Bizi bağışlayın” və digər ekran əsərlərində yaratdığı obrazlar bu gün də böyük maraqla izlənilir.Tamaşaçılar onu xüsusilə “Tənha narın nağılı” filmində canlandırdığı nənə obrazı ilə seviblər. Kiçik görünən bu rol belə aktrisanın ustalığı sayəsində filmin ən yaddaqalan səhnələrindən birinə çevrilib. Ümumiyyətlə, Süsən Məcidovanın istedadının əsas xüsusiyyəti ondan ibarət idi ki, hətta epizodik rol belə onun ifasında tamaşaçının yaddaşına həkk olunurdu.Peşəkar aktyorluq təhsili almamasına baxmayaraq, fitri istedadı, zəhməti və səhnəyə sonsuz sevgisi ona böyük uğur qazandırdı. Cəmi dörd sinif təhsil almış bir qadının Azərbaycan teatr və kino tarixində silinməz iz qoyması onun sənətə nə qədər bağlı olduğunu sübut edir.

Süsən Məcidova 1985-ci ildə dünyasını dəyişib. Lakin onun yaratdığı obrazlar, səhnədə və ekranda canlandırdığı unudulmaz xarakterlər bu gün də yaşayır. O, Azərbaycan teatrının və kinosunun yaddaşında özünəməxsus dəst-xətti olan sənətkar kimi xatırlanır.Sənət uğrunda adını belə dəyişməyə məcbur qalan bu aktrisanın həyat yolu həm dövrün çətinliklərini, həm də əsl sənət eşqinin bütün maneələri aşmağa qadir olduğunu bir daha nümayiş etdirir. Onun xatirəsi yaratdığı yüzlərlə obraz və tamaşaçı sevgisi ilə yaşayır. Ruhu şad olsun.

Turan

Həmçinin oxuyun