"Hikmət Hacıyevin gözləri tutulub" - MÖVQE

Martın 13-də Azərbaycanın bir qrup media orqanı və QHT rəhbərlərinin, blogerlərin, ictimai fəalların işğaldan azad olunmuş Ağdama səfər edib. Onları Azərbaycan Prezidentinin köməkçisi - Prezident Administrasiyasının Xarici siyasət məsələləri şöbəsinin müdiri Hikmət Hacıyev müşayiət edib. Bu səfər Azərbaycanda birmənalı qarşılanmayıb və müstəqil ictimai-siyasi fəalların, jurnalistlərin tənqidilə fərqlənib. 
Azərbaycanın "44 günlük" savaşında Sosial Tədqiqatlar Mərkəzinin hesabatına əsasən internet televiziyaları arasında vətəndaşlar tərəfindən ən çox izlənilən (44%) internet televiziyası Kanal13 olub. Təkcə, 44 gün ərzində Kanal13 86.2 milyon dəfə izlənilib, kanalın sosial şəbəkə hesablarının izləyici sayı 1.3 milyona yaxındır, həmçinin, hər ay kanalı izləyən izləyicilərin 250 mini Ermənistan Respublikasının vətəndaşlarıdır. Kanalın Almaniya və Azərbaycanda barmaqla sayılacaq sayda əməkdaşlarının olmasına baxmayaraq ölkədə gündəlik ən çox özəl reportaj, müsahibə, hadisələri işıqlandıran internet televiziyasıdır. Gündəlik hazırlanan reportajları yüz minlərlə, milyonlarla insan izləyir. Bu nəticələrə baxmayaraq martın 13-də təşkil olunmuş səfərə Kanal13-ün heç bir əməkdaşı dəvət olunmayıb. Ümumiyyətlə, Kanal13-ün Prezident Administrasiyasına ünvanladığı müraciətlərə cavab verilməyib. 

Əvəzində isə nə baş verib? Hikmət Hacıyev və Samir Nuriyev auditoriyası 1 avtobus adamdan ibarət olan "media qurumlarını" Ağdama aparıb. Səfərdə olan bir neçə şəxsi çıxmaq şərtilə əlavə etmək istəyirəm ki, bu adamların evdə nəinki həyat yoldaşına sözü keçmir, heç bu adamların varlığını Allahın özü də unudub. Ağdama aparılan jurnalistlərin böyük əksəriyyətinin nəinki dünya ictimaiyyətinə, heç Xutor əhlinə də sözünü çatdırmaq kimi gücü yoxdur. Şəxsim olaraq hələ dekabrın ilk günlərində Zəngilan, Laçın, Cəbrayıl, Qubadlı rayonlarına səfər etdim. Ağlıma gələn ilk məsələ isə bu oldu ki, bu ərazilərə reytinqli mətbuatı gətirmək, onlara ərazidə sərbəst işləmək şəraitini yaratmaq, onların vasitəsilə erməni vandalizmini dünyaya çatdırmaq lazımdır. Sanki Hikmət Hacıyev iç səsimi duydu, amma söhbəti tam tuta bilmədi. 
Hikmət Hacıyevin sanki gözləri tutuldu, görmədi, kor oldu ki, bu qədər reytinqli mətbuatı dəvət etmədi. Əvəzində 1 avtobus auditoriyası olan onlarla adamı aparıb, mina partlamasını göstərdi. Hikmət Hacıyevin bu xalqa ən böyük yaxşılığı, görəcəyi ən böyük iş isə apardığı adamların böyük əksəriyyəti minalanmış ərazilərdə qoyub, Bakıya qayıtmaq olardı. Əli Həsənovun yolunu gedən Hikmət Hacıyevin ondan tək bir fərqi var ki, bığ saxlamır və gülüşü də bir qədər onun simasına şirinlik qatır. Baxın, Hikmət müəllim, nə qədər ki, gözləriniz tutulacaq, Əli Həsənov, Ramiz Mehdiyevin yolunu gedəcəksiniz, ermənilər də şirin çayını içə-içə, sizdən də gözəl gülərək dünya ictimaiyyətinə "hayastan" qışqıracaq!