90-cı illərdə minaya düşənlər hadisə yerinə aparılacaq 

Azərbaycanda Minadan Zərərçəkənlərin Assosiasiyası (AMZA) İctimai Birliyi Qeyri-Hökumət Təşkilatlarına Dövlət Dəstəyi Agentliyi və Qarabağ Dirçəliş Fondunun birgə elan etdiyi qrant müsabiqəsinin maliyyə dəstəyi ilə “Təhlükəsiz qayıdış: mina təhlükəsi ilə mübarizəyə dəstək” layihəsinin icrasına başlayıb.

Oxu24.com xəbər verir ki, bu barədə AMZA-nın sədri, layihə rəhbəri Rey Kərimoğlu məlumat yayıb.

Onun sözlərinə görə, əsasən 1990-cı illəri - Qarabağda döyüş əməliyyatlarının intensiv gedən dövrü əhatə edən layihənin 4 aya başa çatdırılması nəzərdə tutulub:

“Layihənin əsas məqsədi əhalinin işğaldan azad edilmiş əraziyə təhlükəsiz qayıdışını təmin etməyə dəstək verməkdir. Bildiyiniz kimi, işğalçı ermənilər Qarabağda böyük sayda mina basdırıb. Eyni zamanda ərazidə xeyli sayda partlamamış hərbi sursat var. Təşkilatımız Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə 2024-2025-ci illərdə 19 şəhər və rayonda minadan zərərçəkənlərlə (beynəlxalq forma olan İMİSMA agentləri ilə) sorğular keçirib. 1360 minadan zərərçəkənin mina hadisəsi, onların ehtiyacları öyrənilib.

Bu il biz “Təhlükəsiz qayıdış: mina təhlükəsi ilə mübarizəyə dəstək” layihəsi çərçivəsində işğaldan azad edilmiş ərazilərdə mina insidentinin yerlərini müəyyənləşdirəcəyik. Görəcəyimiz işi daha konkret izah edim: işğaldan azad edilmiş ərazilərdə kim harada minaya düşübsə, həmin şəxsi minaya düşdüyü əraziyə aparacağıq. Birbaşa minaya düşdüyü yerin koordinatları elə ordaca götürüləcək. Mina insidenti yerlərinin koordinatları götürülərək hesabat hazırlanacaq. Bu hesabat ANAMA-ya təqdim ediləcək. Yeri gəlmişkən, xüsusi ilə qeyd edim ki, bu işdə ANAMA rəhbərliyi bizə həmişə dəstək verib. Bu dəfə də onların yaxından dəstəyinə ehtiyacımız olacaq.”

R.Kərimoğlu qeyd edib ki, layihə hələlik Ağdam, Ağdərə və Tərtər rayonlarının ərazisində icra ediləcək:

“Gələcəkdə isə işğaldan azad edilmiş digər ərazilərdə bu iş görüləcək. Açığı, çox unikal, riskli və çətin bir layihədir. Azərbaycanda ilk dəfədir belə bir layihə icra ediləcək. Amma təşkilatımızın yaxşı formalaşmış peşəkar bir komandası var. Eyni zamanda, bu işləri yüksək səviyyədə bilən Beynəlxalq Avrasiya Mətbuat Fondu yenə bizə yaxından dəstək verəcək. Bütün bunları nəzərə alsaq, işimizi uğurla icra edə biləcəyimizə əminik”.

Həmçinin oxuyun

Azərbaycan bu sahəyə 25 milyard ayırdı: Kimlərə təsir edəcək?  — İQTİSADÇI DANIŞIR

Azərbaycanda bu sahəyə diqqət artır:Nə qazanacağıq?

Kraliçanın 45 il daşıdığı sirli üzük açıldı: İçərisindən görün nə çıxdı

Sürücülərin diqqətinə!30 manat oldu  — DİN-in  Kollegiyası  qərar verdi