Azərbaycanın bu rayonunda 10 milyonluq tarixi layihə: İqtisadçıdan MÜHÜM AÇIQLAMA

CƏMİYYƏT

2206

06.07.2026, 21:22

Dağlıq Şirvan iqtisadi rayonunda aqrar sənayenin inkişafına güclü təkan verəcək yeni və nəhəng layihənin icrasına başlanılır. İsmayıllı rayonunun məşhur İvanovka kəndində investisiya dəyəri tam 10 milyon manat olan müasir süd emalı və pendir zavodunun tikilməsi nəzərdə tutulur.

Bu böyük layihə regionda istehsal olunan südün yerində emal edilməsini təmin etməklə yanaşı, xammalın itkisiz şəkildə sənaye məhsuluna çevrilməsinə şərait yaradacaq.

Eyni zamanda, zavodun fəaliyyətə başlaması ölkənin süd məhsulları bazarında daha dayanıqlı və rəqabətqabiliyyətli istehsal zəncirinin formalaşmasını hədəfləyir. Layihənin regionun iqtisadi potensialına və yerli əhalinin məşğulluğuna göstərəcəyi müsbət təsirlər isə indidən böyük maraq doğurur.

Xüsusilə kənd təsərrüfatı sektorunda fəaliyyət göstərən yerli sahibkarlar və fermerlər üçün bu müəssisə yeni qazanc qapısı deməkdir. Müasir texnologiyaların tətbiqi ilə fəaliyyət göstərəcək zavod bölgədə ekoloji təmiz məhsul istehsalını daha da stimullaşdıracaq. İnvestisiya proqramı çərçivəsində regionun infrastrukturunun yenilənməsi və logistik imkanlarının genişləndirilməsi də planlaşdırılır. Belə bir sənaye obyektinin qurulması rəqabət mühitini canlandıraraq yerli brendlərin xarici bazarlara çıxışını da sürətləndirə bilər. Nəticə etibarilə, bu addım həm İsmayıllı rayonunun, həm də bütövlükdə respublikanın qeyri-neft sektorunun inkişaf strategiyasına mühüm töhfə olacaq.

Mövzu ilə bağlı Oxu24.com-a açıqlama verən iqtisadçı-ekspert Natiq Cəfərli layihənin yerli istehsala və məşğulluğa mühüm təsir göstərəcəyini bildirib. Ekspert vurğulayıb ki, İvanovka kəndinin özünəməxsus brend imici bu investisiyanın uğurunu daha da sürətləndirəcək.

"İvanovkanın məhsulları həmişə tanınır"

Ekspert İvanovka süd məhsullarının ölkə bazarındakı güclü mövqeyinə diqqət çəkib:

“Əlbəttə ki, belə investisiyalar yerli istehsalın artmasına, yerli kənd təsərrüfatında çalışan insanların işlə təmin olunmasına pozitiv təsir göstərən investisiyalardır. İvanovka onsuz da süd məhsulları ilə məşhurdur və onun əlavə reklam olunmasına ehtiyac yoxdur. Bakı şəhərində də, ölkənin digər yerlərində də İvanovkanın süd məhsulları tanınır".

Natiq Cəfərli layihənin yerli əhalinin gəlirlərinə birbaşa təsir edəcəyini və rayona əlavə güc qatacağını qeyd edib:

"Ona görə də, əgər layihə doğru-dürüst, vaxtı-vaxtında həyata keçirilsə və işin yaxşı qurulması təşkil edilsə,

həm əlavə iş yerlərinin yaradılmasına, həm də rayonun iqtisadi gücünə əlavə güc qata bilər. Bu isə yerli insanların qazancını artıra biləcək mühüm bir faktora çevriləcək".

Çimnaz Telmanqızı

Həmçinin oxuyun