Azərbaycanda dövlət torpaqlarının icarəsi ilə bağlı yeni güzəşt kimlərə ediləcək?

CƏMİYYƏT

446

25.05.2026, 22:54

Dövlət torpaqlarının icarəsində yeni güzəştlər tətbiq olunur

Oxu24.com xəbər verir ki,Azərbaycanda dövlət torpaqlarının icarəsi ilə bağlı yeni güzəşt mexanizmi tətbiq ediləcək. Nazirlər Kabinetinin qəbul etdiyi yeni qərara əsasən, iri həcmli torpaq sahələrini icarəyə götürən sahibkarlar əvvəlki illərlə müqayisədə daha az ödəniş edəcəklər.

Yeni dəyişikliklərin əsas məqsədi investisiya mühitini yaxşılaşdırmaq, sahibkarların maliyyə yükünü azaltmaq, kənd təsərrüfatı və digər sahələr üzrə fəaliyyətin genişlənməsinə şərait yaratmaq, həmçinin uzun müddətdir istifadəsiz qalan dövlət torpaqlarını iqtisadi dövriyyəyə cəlb etməkdir.

Qərara əsasən, dövlət torpaqlarının icarəsində mövcud baza yanaşması qüvvədə saxlanılır. Belə ki, Bakı şəhərində yerləşən dövlət torpaqları üzrə illik icarə haqqı torpağın bazar dəyərinin 3 faizi həcmində hesablanacaq. Digər şəhər və rayonlarda isə bu göstərici 2 faiz təşkil edəcək.

Əsas yenilik isə iri ölçülü torpaq sahələrinə tətbiq olunan güzəştli əmsallarla bağlıdır. Yeni mexanizmə görə, torpaq sahəsinin ölçüsü artdıqca sahibkarın ödəyəcəyi icarə haqqı mərhələli şəkildə azalacaq. Bununla da iri investisiyaların təşviqi və geniş torpaq sahələrinin istifadəyə verilməsi daha sərfəli olacaq.

Məsələn, əvvəlki qaydalara əsasən Lənkəran rayonunda yerləşən 10 hektar torpaq sahəsi üçün illik icarə haqqı təxminən 10 min manat təşkil edirdisə, yeni güzəştli mexanizm tətbiq edildikdən sonra həmin məbləğ 6 min 200 manata qədər enəcək. Bu isə sahibkarların xərclərində ciddi azalma deməkdir.

İqtisadçılar hesab edirlər ki, yeni qərar xüsusilə aqrar sektor, logistika, sənaye və turizm layihələri ilə məşğul olan sahibkarlar üçün mühüm stimul yaradacaq. Çünki böyük torpaq sahələrinin icarəsi artıq daha əlçatan olacaq və investorlar uzunmüddətli layihələrə daha rahat şəkildə vəsait yönəldə biləcəklər.

Mütəxəssislərin fikrincə, tətbiq ediləcək yeni əmsallar nəticəsində həm icarəyə verilən torpaq sahələrinin sayı artacaq, həm də uzun illər istifadəsiz qalan dövlət torpaqlarının iqtisadi dəyərə çevrilməsi sürətlənəcək. Bununla yanaşı, regionlarda yeni iş yerlərinin yaranması, kənd təsərrüfatı istehsalının genişlənməsi və sahibkarlıq fəaliyyətinin aktivləşməsi də gözlənilir.

Qeyd olunur ki, yeni güzəştlər iri həcmli torpaq sahələrinin dövriyyəyə daxil edilməsini asanlaşdırmaqla yanaşı, dövlət torpaqlarından daha səmərəli istifadəyə də şərait yaradacaq. Bu isə həm iqtisadi aktivliyin artmasına, həm də qeyri-neft sektorunun inkişafına əlavə töhfə verəcək.

NİGAR

Həmçinin oxuyun