İctimai nəqliyyatda yeni dövr: Nələr dəyişəcək? 

Prezident İlham Əliyev tərəfindən imzalanan yeni fərman paytaxtın nəqliyyat sistemində ciddi dəyişiklikləri nəzərdə tutur. 

Sənədə əsasən, “Bakı Metropoliteni” QSC-nin səlahiyyətləri artırılır və qurum daha geniş funksiyalarla yenidən formalaşdırılır. Məqsəd şəhərdaxili nəqliyyat idarəçiliyini vahid struktur altında toplamaqdır. Qəbul edilən qərara uyğun olaraq, “BakuBus” MMC və “Bakı Taksi Xidməti” MMC fəaliyyətini dayandıraraq “Bakı Metropoliteni”nin tabeliyinə verilir. 

Bunun nəticəsində qurum artıq yalnız metro xəttinin idarə olunması ilə kifayətlənməyəcək, eyni zamanda avtobus və taksi xidmətlərinin koordinasiyasını da həyata keçirəcək. Gələcəkdə yenidən istifadəyə verilməsi planlaşdırılan tramvay şəbəkəsinin də bu sistemə daxil ediləcəyi gözlənilir.

Bakının ictimai nəqliyyatında tətbiq ediləcək yeniliyin əhəmiyyəti haqqında fikir bildirən nəqliyyat məsələləri üzrə ekspert Eldəniz Cəfərov Hit.az-a açıqlamasında bildirib ki, dünyanın bir çox böyük şəhərlərində ictimai nəqliyyat artıq parçalanmış şəkildə deyil, mərkəzləşdirilmiş model əsasında idarə edilir:

Həmçinin oxuyun

SON DƏQİQƏ! Prezident yeni qərara İMZA ATDI

Prezident  dəyişkliyi TƏSDİQLƏDİ: Siyahı genişləndi

AQTA ilə sahibkar arasında at əti mövzusu dərinləşir: Qurum video yayacağını AÇIQLADI

Bakının məşhur ərazisində bu qadağa tətbiq olundu -DİQQƏT!

“Paytaxt Bakıda həyata keçirilən yeni dəyişikliklər də məhz bu yanaşmanın tətbiqinə hesablanıb. Məqsəd nəqliyyat sistemində vahid koordinasiya yaratmaq, idarəetmədə çevikliyi artırmaq və müxtəlif nəqliyyat vasitələrinin fəaliyyətini bir-biri ilə uyğunlaşdırmaqdır. Aparılan struktur dəyişiklikləri ilk növbədə sərnişinlərin rahatlığına xidmət etməlidir”.

Ekspertin fikrincə, yeni model tətbiq olunduqdan sonra metro ilə avtobus xətləri arasında əlaqə daha sistemli qurulacaq, gələcəkdə istifadəyə veriləcək yeni nəqliyyat növləri də bu şəbəkəyə inteqrasiya ediləcək:

“Bununla yanaşı, sərnişin sıxlığının tənzimlənməsi, hərəkət qrafikinin optimallaşdırılması və pik saatlarda yaranan problemlərin operativ həlli daha asan olacaq”.