Azərbaycan bu ölkə ilə əlaqələrini genişləndirir—Mühüm sənədlər imzalanacaq  

Türkmənistan Prezidenti Sərdar Berdiməhəmmədovun Azərbaycana rəsmi səfəri planlaşdırılır. Səfər çərçivəsində iki ölkə arasında əməkdaşlığın daha da genişlənməsinə və ikitərəfli münasibətlərin inkişafına mühüm töhfə verəcək bir sıra mühüm sənədlərin imzalanması gözlənilir.

Mövzu ilə bağlı Oxu24.com-a açıqlama verən politoloq Turab Rzayev bildirib ki, Azərbaycan həm ikitərəfli, həm də çoxtərəfli münasibətləri möhkəmləndirməyə xüsusi önəm verir və bu kontekstdə Türkmənistan mühüm ölkə statusundadır. 

Onun sözlərinə görə, Türkmənistan Azərbaycanın Xəzər dənizi sahilində qonşusu olan ölkələrdən biridir. Buna görə də Xəzərin statusu məsələsində, dənizdəki yataqların birgə işlənməsi və əməkdaşlıq şərtlərində Türkmənistan xüsusi rol oynayır:

“Gözlənilən Bakı səfərində Xəzərdəki neft-qaz yataqlarının birgə istismarı, hasilatın və gələcək gəlirlərin bölüşdürülməsi məsələləri müzakirə olunacaq. Eyni zamanda, Türkmənistanın zəngin neft və qaz resurslarının Azərbaycan üzərindən üçüncü ölkələrə tranziti məsələləri də diqqət mərkəzində olacaq”.

Politoloq həmçinin qeyd edib ki, tərəfdaşlıq təkcə enerji sektoru ilə məhdudlaşmır; iki ölkə arasında fiber-optik kabellərin çəkilməsindən tutmuş fərqli istiqamətlərdə geniş qarşılıqlı anlaşmalar mövcuddur.

Turab Rzayev vurğulayıb ki, Türkmənistan həm də bir Türk və müsəlman ölkəsi olaraq Azərbaycan üçün strateji tərəfdaşdır. Azərbaycan Türkmənistanla həm İslam Əməkdaşlıq Təşkilatında, həm Türk Dövlətləri Təşkilatında (TDT), həm də Qoşulmama Hərəkatında fəal şəkildə əməkdaşlıq edir.

Səfərin TDT çərçivəsindəki əhəmiyyətinə toxunan politoloq bildirib:

“Bu cür yüksək səviyyəli siyasi görüşlərin tez-tez keçirilməsində böyük fayda var, çünki Türkmənistan Azərbaycanın qarşılıqlı maraqlı olduğu müxtəlif birləşmələrdə fəal yer alır. Türk Dövlətləri Təşkilatına üzv və müşahidəçi olan ölkələr getdikcə bir-birinə daha çox bağlanır və yaxınlaşırlar”.

T. Rzayev həmçinin əlavə edib ki, indiki halda dünyada qlobal kataklizmlər və müharibə işartıları mövcuddur. Belə bir mürəkkəb dövrdə hər bir ölkənin ayrılıqda mübarizə aparması həm daha çətin, həm də daha xərclidir:

“Bu baxımdan, Türk dövlətlərinin bir araya gəlməsi, o cümlədən Azərbaycan-Türkmənistan əlaqələrinin güclənməsi, bu ölkələrin gələcəkdə birgə müdafiə infrastrukturu qurmağa çalışmasına və regional təhlükəsizliyin təmin olunmasına xidmət edə bilər”.

Çimnaz Telmanqızı

Həmçinin oxuyun

Prezidentin nazir müavini təyin etdiyi şəxs kimdir? - DOSYE  

Bu şəxslərə şad xəbər:10% məbləğ geri qaytarılacaq

SON DƏQİQƏ! Prezident yüksək vəzifəyə təyinat etdi

Azərbaycanda pensiya yaşı ilə bağlı mühüm AÇIQLAMA