Cinayətlə bağlı günahsız olduğunuzu kim sübut etməlidir? – Vəkildən AÇIQLAMA

Cəmiyyətdə ən çox yanlış anlaşılan və hüquqi savadsızlıqdan qaynaqlanan məsələlərdən biri də cinayət törətməkdə şübhəli bilinən və ya ittiham olunan şəxslərin öz günahsızlıqlarını sübata yetirməyə çalışmasıdır. Çox vaxt vətəndaşlar elə düşünürlər ki, əgər onlara qarşı hər hansı bir ittiham irəli sürülübsə, mütləq özlərini təmizə çıxarmaq üçün dəlillər axtarmalıdırlar.

Bəs qanunvericilik bu barədə nə deyir? Oxu24.com xəbər verir ki, məsələyə vəkil Elvin Səfərov aydınlıq gətirib.

“Günahsızlığınızı sübut etmək sizin vəzifəniz deyil!"

Vəkil Elvin Səfərov bildirib ki, şəxsə qarşı irəli sürülmüş cinayət ittihamı üzrə onun günahsız olduğunu sübut etmək heç də həmin şəxsin üzərinə düşən bir öhdəlik deyil:

“Sizə qarşı irəli sürülmüş cinayət işi üzrə hər hansı bir ittihamla bağlı günahsızlığınızı sübut etmək sizin vəzifəniz deyil. İttiham tərəfi sizin bu cinayəti törətdiyinizi sübut etməlidir və bu, məhz onun vəzifəsidir”.

Vəkilin toxunduğu bu məqam birbaşa olaraq hüququn fundamental prinsiplərindən biri olan təqsirsizlik prezumpciyasına əsaslanır. Qanunvericiliyə görə, şəxsin təqsiri qanuni qüvvəyə minmiş məhkəmə hökmü ilə sübuta yetirilməyibsə, o, günahsız sayılır. Yəni, dövlət ittihamçısı (prokuror) və ya istintaq orqanı şəxsin cinayət törətdiyini faktlarla, təkzibedilməz sübutlarla ortaya qoymalıdır. Müttəhim isə sadəcə susmaq və ittiham tərəfinin zəif tərəflərini izləmək hüququna malikdir.

Belə hallarla qarşılaşanda nə etməli? 

Elvin Səfərov cinayət təqibi ilə üzləşən və ya ittiham olunan şəxslərə ilk addımda necə davranmalı olduqları barədə strateji məsləhətlər verib. Vəkil qeyd edib ki, emosiyalara qapılaraq tələsik ifadələr vermək yox, soyuqqanlı davranmaq lazımdır:

“İlk növbədə susmaq hüququndan istifadə edin. Qarşı tərəfin (ittiham tərəfinin) əlində hansı sübutların, dəlillərin olduğunu tam anlamaq üçün ilk olaraq prosesi kənardan izləyin.

İttihamın sübutlarını öyrənin. Müdafiənizi gücləndirmək məqsədilə, ittiham tərəfinin sizə qarşı hansı əsaslarla çıxış etdiyini dərindən analiz edin.

Öz sübutlarınızı vaxtında təqdim edin. Yalnız ittiham tərəfinin kartları bəlli olduqdan və müdafiə xəttiniz tam formalaşdıqdan sonra öz lehinizə olan sübutları istintaq orqanına və ya məhkəməyə təqdim edin”.

Cinayət prosesində düzgün müdafiə taktikası seçmək və qanunun verdiyi hüquqlardan vaxtında yararlanmaq şəxsi əsassız məsuliyyətdən qoruyan ən mühüm amildir.

Çimnaz Telmanqızı

Həmçinin oxuyun

Güclü külək olacaq -XƏBƏRDARLIQ

Üzücü xəbər:Xalq şairi  süni tənəffüs aparatına qoşulub

Dənizdə batan şəxs görün kim İMİŞ -FOTO

İlham Əliyev təbrik məktubu göndərdi