“Zəngəzur dəhlizi bəzi rayonlarda əmlakın dəyərini artıra bilər” — EKSPERT RƏYİ

İQTİSADİYYAT

15.06.2026, 14:00

Son dövrlər regional və beynəlxalq miqyasda ən çox müzakirə olunan, həm iqtisadi, həm də strateji nöqteyi-nəzərdən böyük çəkiyə malik olan qlobal layihələrdən biri də şübhəsiz ki, Zəngəzur dəhlizidir. Bu dəhliz sadəcə iki coğrafi nöqtəni birləşdirən adi bir yol deyil; o, gələcəkdə qitələrarası yükdaşımaların gedişatını dəyişdirəcək, yeni nəqliyyat və ticarət marşrutlarının formalaşmasına rəvac verəcək nəhəng bir infrastruktur qovşağıdır. Tarixi təcrübə və iqtisadi qanunauyğunluqlar regional kontekstdə açıq şəkildə göstərir ki, bu miqyasda iri infrastruktur layihələrinin reallaşdırıldığı, keçdiyi və ya birbaşa təsir dairəsinə düşdüyü ərazilərdə torpaq və daşınmaz əmlaka olan tələbat sürətlə artmağa başlayır. İnfrastrukturun inkişafı, yeni logistik imkanlar və biznes subyektlərinin həmin bölgələrə axını istər-istemez daşınmaz əmlak bazarını canlandırır və qiymətlərin artım tendensiyasını stimullaşdırır. Bəs Zəngəzur dəhlizi layihəsi tam mənası ilə reallaşacağı təqdirdə, ölkəmizin məhz hansı bölgələrində əmlak qiymətlərində daha kəskin artımlar müşahidə oluna bilər? Hansı rayon və şəhərlərimiz bu nəhəng layihənin iqtisadi dividendlərindən daha çox pay alacaq?

Mövzu ilə bağlı Oxu24.com-un suallarını cavablandıran əmlak məsələləri üzrə ekspert Elnur Azadov bildirib ki, Zəngəzur dəhlizinin açılması və onun strateji yerləşməsi əslində kifayət qədər uzun müddətdir ki, aktiv müzakirə mövzusudur.

Ekspertin sözlərinə görə, bu nəhəng layihə reallaşacağı təqdirdə, sözügedən coğrafi istiqamət sırf loqistika baxımından ən perspektivli rayon və regional qovşaq statusunu qazanacaq. Bu isə öz növbəsində həmin ərazidə əmlak növlərinə yanaşmanı tamamilə dəyişəcək.

Elnur Azadov qeyd edir ki, dəhlizin fəaliyyətə başlaması ilə birlikdə gələcəkdə həmin bölgədə:

•Müxtəlif təyinatlı irihəcmli anbarlar,

•Müasir anqarlar,

•Aktiv ticarət sahələri və infrastruktur obyektləri formalaşacaq.

Layihənin gətirdiyi beynəlxalq və yerli yük axını həmin ərazinin gələcəkdə həm şəhər, həm də rayon olaraq tamamilə bu yönümlü, yəni loqistika və ticarət mərkəzi kimi inkişaf etməsinə yol açacaq. Təbii olaraq, belə bir iqtisadi canlanma və funksional dəyişiklik həmin ərazilərdəki daşınmaz əmlakın və torpaq sahələrinin dəyərinin ciddi şəkildə artmasına əsas səbəb olacaq.

“Hər şey dövlətin strategiyasından asılı olacaq”

Bununla belə, ekspert vurğulayır ki, bölgədə əmlak bazarı və torpaq sahələri ilə bağlı proseslər birbaşa olaraq dövlətin öz strateji planlamasından və atacağı addımlardan asılı vəziyyətdədir. Hazırda bu istiqamətdə təşkilati məsələlərin necə tənzimlənəcəyi hələ ki, tam dəqiqləşməyib və sual altındadır.

Elnur Azadovun fikrincə, qiymətlərin və bazarın formalaşmasında əsas rolu dövlətin torpaq siyasəti oynayacaq:

“Torpaqlar açıq şəkildə satılacaq, yoxsa icarəyə veriləcək? Ümumiyyətlə, bu sahədə təşkilatçılıq məsələləri hansı formada və necə həyata keçiriləcək?

Bu məsələlər hələ ki tam aydın deyil və sual altındadır. Ona görə də gələcəkdə qiymət artımının tempini və bazarın strukturunu məhz dövlətin bu təşkilati qərarları müəyyənləşdirəcək”,-deyə ekspert əlavə edib.

Çimnaz Telmanqızı

Həmçinin oxuyun