Bakı 2027-ci ildə Dünya Çempionatına ev sahibliyi edəcək — Ekspertdən VACİB AÇIQLAMA  

Azərbaycan növbəti dəfə mötəbər idman yarışına ev sahibliyi etməyə hazırlanır. 2027-ci ildə bədii gimnastika üzrə Dünya Çempionatının Bakıda keçirilməsi haqqında qərar idman ictimaiyyəti tərəfindən böyük sevinclə qarşılanıb. Bu mötəbər turnir ölkəmizin beynəlxalq idman arenasında olan nüfuzunu daha da möhkəmləndirəcək. Olimpiadadan sonra zərif, lakin çətinliyi ilə fərqlənən bu idman növünün en böyük yarışı məhz paytaxtımızda cərəyan edəcək. Dünyanın ən güclü gimnastlarının Bakıda mübarizə aparması həm azarkeşlər, həm də yerli idmançılar üçün böyük şans hesab olunur. Analitiklər bu turnirin ölkədə bədii gimnastikanın inkişafına növbəti güclü təkan verəcəyini vurğulayırlar.

Mövzu ilə bağlı Oxu24.com-a açıqlama verən idman eksperti Kənan Məstəliyev bildirib ki, bədii gimnastika üzrə Dünya Çempionatının Azərbaycanda keçirilməsi qərarı son dərəcə sevindirici və qürurvericidir:

"Bu, nüfuzlu və böyük bir yarışdır. Olimpiada oyunlarından sonra zərif, amma bir o qədər də çətin olan bu idman növünün ən böyük yarışı hesab olunur. Burada dünyanın ən yaxşı gimnastları iştirak edirlər. Belə idmançıların performansını Bakıda, öz paytaxtımızda canlı izləmək həqiqətən də böyük bir şans və zövq olacaq. Ən azından idman ictimaiyyəti, azarkeşlər və idmansevərlər baxımından bu, çox böyük bir hadisədir”.

Ekspert qeyd edib ki, bu yarış gimnastlarımızın daha böyük heyətlə mübarizə aparması baxımından da xüsusi əhəmiyyət daşıyır:

“Gənc və yeniyetmə gimnastlarımız bədii gimnastikanın zirvəsində olan idmançıları öz gözləri ilə görmək, onların performanslarını yaxından izləmək imkanı əldə edəcəklər. Bu da gənclərə öz kumirlərini yaxından görüb onlara bənzəmək, çıxışlarını təkrar etmək üçün daha çox əmək sərf etməyə və çalışmaya əlavə həvəs verəcək”.

Kənan Məstəliyevin sözlərinə görə, bu turnir Azərbaycanda onsuz da yaxşı səviyyədə olan bədii gimnastikanın inkişafına növbəti bir təkan olacaq. Bu səbəbdən Dünya Çempionatının ölkəmizdə keçirilməsi qərarını ancaq və ancaq alqışlamaq olar.

Çimnaz Telmanqızı

Həmçinin oxuyun

İşləyən şəxslərə VACİB XƏBƏR: Məzuniyyət belə veriləcək

Məktəbli faciəli şəkildə həyatını itirdi  - FOTO

5 oktyabrda bu bürclərə uğurlu olacaq   —  ULDUZ FALI

10 gün ərzində qeydiyyata düşməyənləri CƏRİMƏ GÖZLƏYİR – Hüquqşünas açıqladı