Qətərdə qaz istehsalı yenidən başlayır

Qətər yaxın həftələrdə mayeləşdirilmiş təbii qaz (LNG) istehsalını yenidən normal səviyyəyə çatdırmağı planlaşdırır.

Oxu24.com xarici KİV-lərə istinadən xəbər verir ki , Qətərin Baş naziri Şeyx Məhəmməd bin Əbdülrəhman əl-Tani bu barədə “Financial Times” qəzetinə müsahibəsində danışıb. O bildirib ki, ABŞ və İran arasında əldə olunan müvəqqəti razılaşmadan sonra ölkə enerji sektorunda fəaliyyətini tam bərpa etməyə hazırlaşır.

Baş nazirin sözlərinə görə, Qətər dünyanın ikinci ən böyük LNG istehsalçısıdır. Mart ayında Ras Laffan qaz emalı kompleksinə dron hücumu nəticəsində istehsal dayandırılmışdı. Hazırda isə bərpa işləri sürətlə davam etdirilir.

“Bir neçə həftə ərzində istehsal normal vəziyyətə qayıdacaq. Yalnız zədələnmiş obyekt istisna olmaqla, bütün sahələrdə fəaliyyət bərpa olunacaq. Komandalarımız artıq bir neçə həftədir səfərbər olunub və QatarEnergy boğazlarda vəziyyət sabitləşən kimi tam fəaliyyətə qayıtmağa hazırdır”, – deyə əl-Tani bildirib.

Bununla yanaşı, o vurğulayıb ki, dövlətə məxsus QatarEnergy şirkəti mart ayında elan etdiyi fors-major rejimini yalnız bütün təhlükəsizlik və əməliyyat problemləri aradan qaldırıldıqdan sonra ləğv edəcək.

Qətərin Baş naziri ABŞ və İran arasında yaradılmış birbaşa əlaqə mexanizminin Hörmüz boğazında gəmiçiliyin təhlükəsizliyinin təmin olunması baxımından mühüm rol oynadığını qeyd edib. Onun sözlərinə görə, bu mexanizm hər hansı təhlükə ilə üzləşən gəmilərin yoxlanılmasını və təhlükəsiz keçidinin təmin edilməsini nəzərdə tutur.

Əl-Tani bildirib ki, ABŞ-İran anlaşmasının 30-cu gününədək Hörmüz boğazından keçən gəmiçilik həcminin müharibədən əvvəlki səviyyəyə qayıtması gözlənilir. Bununla belə, o, etimadın bərpası və ticarət marşrutlarının tam normallaşması üçün müəyyən zamana ehtiyac olduğunu vurğulayıb.

Baş nazir həmçinin İranın Hörmüz boğazında rüsum tətbiq etmək təşəbbüsünə qarşı olduqlarını bildirib. O qeyd edib ki, Qətər üçün bu boğaz dünyaya çıxışı təmin edən əsas və yeganə dəniz marşrutudur və onun hər hansı formada nəzarət altına alınmasını qəbul etmək mümkün deyil.

Həmçinin oxuyun

Bakıda yaşayanlara mühüm xəbər:Hansı dəyişiklik OLACAQ?

Yüksək vəzifəyə təyinat aldı  —  ƏMR İMZALANDI

Milli Hidrometeorologiya Xidməti xəbərdarlıq yaydı: 40 dərəcə isti olacaq

Elgiz Əkbər açıqladı: Yeni layihə gəlir -VİDEO