Ermənistanda “Dördüncü Respublika”nın formalaşması regionda siyasi reallıqları necə dəyişəcək?

CƏMİYYƏT

150

20.08.2026, 17:25

Xəbərlərimizi Google-da izləyin

Yeniliklərdən dərhal xəbərdar olun

Ermənistan parlamentinin müxalif deputatı İşxan Saqatelyanın ölkədə Türkiyə və Azərbaycanın iradəsi ilə "Dördüncü Respublika"nın qurulması barədə səsləndirdiyi fikirlər regionun siyasi gündəmində geniş müzakirələrə səbəb olub. Müxalif deputatın iddialarına görə, bu prosesdə Türkiyə "memar", Azərbaycan "konstruktor", Qərb ölkələri isə "dizayner" rolunu oynayır. Qonşu ölkədə baş verən bu daxili siyasi çəkişmələr və səslənən fikirlər Azərbaycan ictimaiyyəti və siyasi dairələri tərəfindən də yaxından izlənilir. Regionda formalaşan yeni reallıqlar fonunda Ermənistanın gələcək dövlətçilik modeli və onun təhlükəsizlik xətti sual altında qalmaqdadır. Mövzu ilə bağlı Oxu24.com-a açıqlama verən Ağ Partiyanın sədri, siyasətçi Tural Abbaslı məsələyə münasibət bildirib.

Tural Abbaslı bildirib ki, Ermənistanda səsləndirilən bu fikir ilə razılaşmamaq mümkün deyil. Çünki Azərbaycan Qarabağı işğaldan azad etdikdən sonra Ermənistan həqiqətən də yeni bir mərhələyə qədəm qoyub. Bu mərhələ Türkiyənin, Azərbaycanın, eləcə də Avropa və Amerikanın təsiri ilə davam edir:

“Paşinyan və ya başqa bir erməni siyasətçisi yeni formalaşan mərhələdə Azərbaycan və Türkiyənin rol almasını könüllü şəkildə istəməzdi. Lakin bu, acı bir reallıqdır və onlar bununla barışmağa məcburdurlar”.

Onun sözlərinə görə, Qərb isə hazırda Rusiyanın yerini tutmağa çalışır:

“Ermənistan üçün də bu daha əlverişli variant görünür; çünki onları öz təsir dairəsində saxlayan mütfəfiqdənsə, investisiya qoyacaq və layihələr gətirəcək Qərbə yönəlmək daha sərfəlidir”.

Siyasətçi qeyd edib ki, burada əsas sual budur: bu layihənin yekununda Ermənistan itirir, yoxsa qazanır?:

“Məncə, Ermənistan qazanır. Onlar dövlət qurur, iqtisadiyyatlarını inkişaf etdirməyə və qonşularla normal münasibətlər quraraq sivil dövlət statusuna keçməyə addım atırlar. Həmin müxalifətçiyə sual vermək lazımdır: sizin alternativiniz nədir? Rusiyanın memarlığı, Şimali Koreyanın dizaynerliyi, yoxsa İranın konstruktorluğu ilə qurulan Ermənistan? Biz Rusiyanın, İranın və Hindistanın yön verdiyi Ermənistanı gördük — 44 günə darmadağın oldular”.

T.Abbaslı vurğulayıb ki, məsələyə şəxsi və partiya yanaşmamdan baxacaq olsaq, biz hakimiyyətdə olsaydıq, Ermənistana bu şəraiti yaratmazdıq:

“Ermənistanın dördüncü və ya beşinci dövlət mərhələsinə keçməsinə imkan verməzdik. Çünki mənim mövqeyim odur ki, Ermənistanın bir dövlət kimi varlığı regiona, Azərbaycana və Türkiyəyə təhlükədir. İqtisadiyyatı və dövlətçiliyi güclənən Ermənistan gələcəkdə yenidən Naxçıvana, Qarabağ və digər ərazilərimizə iddia ortaya qoyacaq. Qədim nağıllarımızda deyildiyi kimi — düşmənin belini yerə vurduqdan sonra onun başını kəsmək lazımdır”.

Çimnaz Telmanqızı

Həmçinin oxuyun