Milli Qurtuluş Günü: Xalqın İradəsi və Lider Faktoru  

 Azərbaycanın müasir dövlətçilik tarixində 15 İyun – Milli Qurtuluş Günü xüsusi yer tutur.

Bu tarix təkcə siyasi hadisə deyil, həm də xalqın iradəsinin, milli birliyinin və uzaqgörən liderliyin təntənəsi kimi qiymətləndirilir.

1993-cü ilin iyununda ölkədə yaranmış mürəkkəb ictimai-siyasi vəziyyət Azərbaycanı ciddi təhlükələrlə üz-üzə qoymuşdu.

Dövlət müstəqilliyinin itirilməsi, vətəndaş qarşıdurmasının dərinləşməsi və idarəetmə böhranı ölkənin gələcəyini sual altına almışdı. Belə bir dövrdə Azərbaycan xalqı öz taleyini etibarlı əllərə həvalə etmək üçün Ümummilli Lider Heydər Əliyevə müraciət etdi. Xalqın çağırışına cavab verən Heydər Əliyevin hakimiyyətə qayıdışı ölkənin siyasi həyatında dönüş nöqtəsinə çevrildi. 1993-cü il iyunun 15-də onun Azərbaycan Respublikası Ali Sovetinin sədri seçilməsi dövlətçilik tariximizin yeni mərhələsinin başlanğıcı oldu. Milli Qurtuluş Günü xalqın iradəsinin dövlətin taleyində həlledici rol oynadığını göstərən mühüm tarixi hadisədir. Azərbaycan xalqı həmin dövrdə milli maraqları şəxsi və siyasi mənafelərdən üstün tutaraq sabitlik, təhlükəsizlik və inkişaf yolunu seçdi. Bu seçim ölkənin gələcək tərəqqisinin əsasını təşkil etdi.

Lider faktoru isə Milli Qurtuluşun əsas sütunlarından biri kimi tarixə düşdü. Ulu Öndər Heydər Əliyevin zəngin dövlətçilik təcrübəsi, qətiyyətli qərarları və uzaqgörən siyasəti sayəsində ölkədə ictimai-siyasi sabitlik bərpa olundu, qanunçuluq möhkəmləndirildi və dövlət institutlarının fəaliyyəti təmin edildi. Sonrakı illərdə həyata keçirilən iqtisadi və siyasi islahatlar Azərbaycanın sürətli inkişafına şərait yaratdı. Bu gün Milli Qurtuluş Günü Azərbaycanın müstəqilliyinin qorunmasının, dövlətçilik ənənələrinin möhkəmləndirilməsinin və milli həmrəyliyin rəmzi kimi qeyd olunur. Xalqın iradəsi və güclü liderlik amili sayəsində əldə olunan uğurlar müasir Azərbaycanın inkişaf yolunun əsas dayaqlarından biri olaraq qalır.15 İyun tarixinin əhəmiyyəti yalnız keçmişlə məhdudlaşmır. Bu gün həm də gələcək nəsillərə dövlətçiliyin, milli birliyin və vətənpərvərliyin vacibliyini xatırladan mühüm tarixi dərsdir. Milli Qurtuluş Günü Azərbaycan xalqının gücünün, birliyinin və liderinə olan etimadının parlaq təcəssümüdür.

      Azərbaycan Dövlət Pedaqoji Universitetinin müəllimi, gənc alim

                                        Osman Azadoğlu

Həmçinin oxuyun

Bakıda yaşayanlara mühüm xəbər:Hansı dəyişiklik OLACAQ?

Yüksək vəzifəyə təyinat aldı  —  ƏMR İMZALANDI

Milli Hidrometeorologiya Xidməti xəbərdarlıq yaydı: 40 dərəcə isti olacaq

Elgiz Əkbər açıqladı: Yeni layihə gəlir -VİDEO