Sükan arxasına keçən məktəbli - FACİƏ QAÇILMAZDIR 

Son zəng zamanı bəzi məktəblilərin sürücülük vəsiqəsi olmadan avtomobil idarə etməsi faciə ilə nəticələnir.

Oxu24.com xəbər verir  ki,nəqliyyat məsələləri üzrə ekspert Aslan Əsədov Ajans.az-a açıqlamasında bildirib ki, bu cür halların olması gənclər arasında nəzarətsizliyin artmasının göstəricisidir.

 Ekspertin sözlərinə görə, bəzi valideynlərin övladlarının digərlərindən fərqlənməsini istəməsi ciddi təhlükə yaradır:

“Çox təəssüflə qeyd etməliyik ki, son dövrlər gənclər arasında nəzarətsizlik halları artır. Bəzi valideynlər övladlarının daha seçilən görünməsini istəyirlər. Bu isə təkcə nəqliyyat vasitələrinin idarə edilməsində deyil, ümumi davranışlarda da özünü göstərir. Xüsusilə son zəng kimi emosional günlərdə valideynlər övladlarına daha ciddi nəzarət etməlidirlər.Ailə üzvləri – valideyn, baba, nənə, böyük qardaş və ya digər yaxınlar onların yanında olmalı, təhlükəsizliklərinə diqqət yetirməlidirlər.”

Ekspert xatırladıb ki, əvvəlki illərdə son zəng tədbirləri zamanı baş vermiş yol-nəqliyyat hadisələri ağır nəticələrə səbəb olub:

“Bir neçə il əvvəl son zəngi qeyd edən məktəblilərin olduğu avtomobillərdən biri qəzaya düşmüşdü və nəticədə beş nəfər həyatını itirmişdi. Hadisə bir anda baş verir və faciəyə çevrilir.” 

Əsədov vurğulayıb ki, sürücülük hüququ olmadan avtomobil idarə edən şəxslər aşkarlanarsa, qanunvericiliyə uyğun tədbirlər görülür: 

“Sürücülük vəsiqəsi olmayan şəxs sükan arxasında aşkarlanarsa, avtomobil cərimə meydançasına aparılır. Daha sonra hadisənin detalları araşdırılır. Əgər əlavə qanun pozuntuları da müəyyən edilərsə, məsələ hüquqi müstəvidə tədbir görülür.”

Ekspert məktəblərlə hüquq-mühafizə orqanları arasında əməkdaşlığın mövcud olduğunu bildirsə də, əsas məsuliyyətin valideynlərin üzərinə düşdüyünü qeyd edib:

“Məktəblər və hüquq-mühafizə orqanları arasında əməkdaşlıq var. Amma əsas məsələ valideyn nəzarətidir. Avtomobilin açarını verən də, verməyən də valideyndir. Valideyn istəməsə, məktəbli qaydanı poza bilməz.”

Həmçinin oxuyun

Bakıda yaşayanlara mühüm xəbər:Hansı dəyişiklik OLACAQ?

Yüksək vəzifəyə təyinat aldı  —  ƏMR İMZALANDI

Milli Hidrometeorologiya Xidməti xəbərdarlıq yaydı: 40 dərəcə isti olacaq

Elgiz Əkbər açıqladı: Yeni layihə gəlir -VİDEO