Direktor niyə məktəbə gəlmir? - Valideyn və müəllimlər narazıdır 

Füzuli rayonu Babı kəndində yerləşən şəhid Marks Hacıyev adına orta məktəbin bir qrup valideyn və müəllimi direktor İsrafil Əliyevdən narazıdırlar. 

Oxu24.com xəbər verir ki,b barədə valideynlər “Qafqazinfo”ya müraciətlərində bildiriblər. 

Onların sözlərinə görə, 2026-cı ilin fevralın əvvəllərində başlayan narazılıqların səbəbi direktorun öz adına rəsmiləşdirilmiş dərs saatlarını tədris etməməsi, məktəbə gəlmədən həm müəllim, həm də direktor kimi əməkhaqqı alması, eləcə də məktəbə verilmiş kompüter və printeri təhsil ocağından aparması ilə bağlı iddialar olub: “Həmin vaxt etiraz etmişdik. Daha sonra Füzuli Təhsil Sektorunun müdiri Ramella Məmmədova və digər məsul şəxslər müəllim kollektivi ilə görüş keçiriblər. Görüş zamanı direktorun dərslərə davam etmədən aldığı əməkhaqqının tutulması, həmçinin rəhbər kimi üzərinə düşən vəzifələri icra etmədiyinə görə işdən azad olunması tələbləri səsləndirilib. Sektor müdiri tərəfindən bildirilib ki, məktəb direktoruna yol verdiyi nöqsanları aradan qaldırması üçün müəyyən vaxt veriləcək, bu müddət ərzində vəziyyətdə dəyişiklik olmadığı təqdirdə isə onun işdən azad olunması məsələsinə baxılacaq”.

Şikayətçilərin sözlərinə görə, həmin müddətdən dörd aya yaxın vaxt keçməsinə baxmayaraq, İsrafil Əliyev yenə də dərslərə davamlı şəkildə gəlmir: “O, bir ay müddətinə xəstəlik vərəqəsi açdırır, daha sonra qısa müddət – təxminən 5-10 gün məktəbə gəldikdən sonra yenidən xəstəlik vərəqəsi götürür. İsrafil müəllimin aylarla məktəbə gəlməməsinə baxmayaraq, ona qarşı hər hansı tədbir görülmür. Bu vəziyyət isə məktəb kollektivi və valideynlər arasında narazılığın davam etməsinə səbəb olur və İsrafil müəllimin bu statusunu nə ilə qoruduğu barədə suallar doğurur”.

İddialarla əlaqədar Qarabağ Regional Təhsil İdarəsinə sorğu ünvanladıq. Qurumdan müraciətimizə belə cavab verildi: “Füzuli rayonu Marks Hacıyev adına Babı kənd tam orta ümumtəhsil məktəbinin direktoru İsrafil Əliyev hazırda səhhətində yaranmış problemlərlə əlaqədar ambulator müalicədə olmaqla əmək qabiliyyətinin müvəqqəti itirilməsinə görə bülletendədir. Qeyd edirik ki, səsləndirilən iddialarla bağlı araşdırma aparılacaq”.

Həmçinin oxuyun

Bakıda yaşayanlara mühüm xəbər:Hansı dəyişiklik OLACAQ?

Yüksək vəzifəyə təyinat aldı  —  ƏMR İMZALANDI

Milli Hidrometeorologiya Xidməti xəbərdarlıq yaydı: 40 dərəcə isti olacaq

Elgiz Əkbər açıqladı: Yeni layihə gəlir -VİDEO