Ekspertdən ali məktəblərə imtahansız qəbul barədə AÇIQLAMA: "Bir çox ölkələri qabaqlayırıq"

$Ekspertdən ali məktəblərə imtahansız qəbul barədə AÇIQLAMA: \"Bir çox ölkələri qabaqlayırıq\"$

CƏMİYYƏT

14.05.2026, 15:32

Oxu24.com xəbər verir ki, ali təhsil müəssisələrinə müsabiqəsiz, yəni imtahan vermədən qəbul olunma qaydaları hər il ictimaiyyətə təqdim olunur. Bu qaydalar beynəlxalq və respublika səviyyəli uğurları olan gənclər üçün böyük imtiyazlar yaradır.

Mövzu ilə bağlı təhsil eksperti Elmin Nuri Oxu24.com-a açıqlama verib.

Ekspert bildirib ki, rəsmi məlumatlarda bu imtiyazdan faydalanmaq üçün irəli sürülən tələblər və uğur qazanması vacib olan müsabiqələrin siyahısı tam şəkildə əks olunur:

“Biz burada təkcə beynəlxalq olimpiadalar və respublika fənn olimpiadalarının qaliblərini deyil, həm də bir sıra idman yarışları və musiqi festivallarının qaliblərini nəzərdə tuturuq. Həmin siyahı ilə tanış olsanız, orada hansısa detalın unudulmadığını görə bilərsiniz”.

“Beynəlxalq təcrübədə bir çox ölkəni qabaqlayırıq"

Elmin Nuri qeyd edib ki, hazırkı siyahı kifayət qədər mükəmməldir və bütün zəruri qrupları əhatə edir:

“Düşünürəm ki, universitetlərə imtahansız qəbul üçün hansı qruplara şans verilməlidirsə, elə onların hamısı burada əksini tapıb, heç bir detal unudulmayıb. Qeyd edim ki, beynəlxalq təcrübəyə nəzər salsaq, ali təhsil müəssisələrinə qəbul güzəştlərində biz bir çox ölkələri qabaqlayırıq”.

Siyahının gələcəkdə genişlənib-genişlənməyəcəyi barədə suala cavab verən ekspert, hazırkı vəziyyətin yüksək səmərəliliyini vurğulayıb:

“Gələcəkdə hansı dəyişiklik olacaq, ya olmayacaq – bunu deyə bilmərik, amma hazırkı imtiyazlı siyahı özünün kifayət qədər məhsuldarlığı ilə seçilir”.

Qeyd edək ki, hazırkı qaydalara əsasən, beynəlxalq fənn olimpiadalarında medal qazananlar, həmçinin respublika fənn olimpiadalarının qalibləri müvafiq ixtisaslar üzrə ali məktəblərə müsabiqədənkənar qəbul olunmaq hüququna malikdirlər.

Çimnaz Telmanqızı

Həmçinin oxuyun