AzTV-də kütləvi yoluxma ilə bağlı RƏSMİ AÇIQLAMA - YENİLƏNDİ

AzTV 50-dən çox əməkdaşının koronavirusa yoluxması ilə bağlı yayılan xəbərə münasibət bildirib.

Kanalın Sosial media və ictimaiyyətlə əlaqələr şöbəsinin rəisi Nərgiz Rəfiyeva Qafqazinfo-ya açıqlamasında məlumatı təkzib edib:

“50-dən çox əməkdaşımızda koronavirusa yoluxma halının qeydə alınması ilə bağlı yayılmış məlumat düzgün deyil. Televiziya və Radio Akademiyasının prorektorları Almaz Mahmud, Ülfət Rəhimovanın yoluxması ilə bağlı məlumat mediada bir müddət öncə işıqlandırılmışdı. Onlar müalicə alırlar və artıq vəziyyətləri də yaxşıdır. Ancaq sədr müavini Rafiq Həşimovun yoluxması ilə bağlı yayılmış xəbər doğru deyil”.

***10:24

“Azərbaycan Televiziya və Radio Verilişləri” QSC-də koronavirus sürətlə yayılıb.

Yenicag.az-ın əldə etdiyi məlumata görə, AzTV-də 50-dən çox əməkdaş koronavirusa yoluxub.

Yoluxanlar arasında sədr müavini Rafiq Həşimov, AzTV-nin Televiziya və Radio Akademiyasının prorektorları Almaz Mahmud, Ülfət Rəhimova da var. Vəzifəli şəxlərlə yanaşı AzTV-də 50-dən çox şəxsin koronavirusa yoluxduğu deyilir. Rəsmi məlumatlarda isə cəmi altı nəfərin yoluxduğu göstərilir.

Yoluxmanın geniş yayılmasına səbəb isə AzTV-nin operatorlarından birinin koronavirusa yoluxduqdan sonra onu karantinə alıb ancaq onunla ünsiyyətdə olan şəxsləri karantinə almamaları olub. AzTV-də prorektorlarla, sədr müavini ilə yanaşı aparıcıların, texniki işçilərin də yoluxduğu barədə məlumat əldə etmişik. Görünən odur ki, AzTV karantini ciddiyə almayıblar.

AzTV-də hazırda vəziyyətin çox acınacaqlı olduğu bildirilir. Yoluxma sayı göstərir ki, AzTV hazırda karantinə alınmalıdır.

Yazıda adı keçən şəxslərin mövqeyini dərc etməklə bərabər hər birinə şəfa arzulayırıq.