Ayaqlardakı hər keyimə damar tutulması demək deyil – KARDİOLOQDAN XƏBƏRDARLIQ  

Ayaqlarda keyimə, üşümə və hissiyyatın zəifləməsi gündəlik həyatda tez-tez rast gəlinən şikayətlərdəndir. Xüsusilə şəkərli diabetdən əziyyət çəkən şəxslər bu cür əlamətləri damar tutulması ilə əlaqələndirərək narahatlıq keçirə bilirlər.

Lakin mütəxəssislər bildirirlər ki, ayaqlarda yaranan hər keyimə damar problemi ilə əlaqəli deyil. Bu cür şikayətlər sinir sisteminin zədələnməsi nəticəsində də yarana bilər. Diabetli şəxslərdə bu vəziyyət diabetik neyropatiya ilə əlaqəli ola bilər.

Məsələ ilə bağlı Oxu24.com-a açıqlama verən invaziv kardioloq Dr. Üzeyir Rəhimov bildirib ki, ayaqlarda yaranan hər hansı keyimə və hissiyyat pozğunluğu birbaşa damar tutulması anlamına gəlmir.

“Hər keyimə damar tutulması demək deyil”

Həkimin sözlərinə görə, xüsusilə şəkərli diabet xəstələri ayaqlarında keyimə hiss etdikdə dərhal damar tutulmasından şübhələnirlər.

“Bəzi hallarda ayaqlarda hiss edilən keyimə əslində sinir əlaməti ola bilər. Tibbdə buna diabetik neyropatiya deyilir. Şəkər xəstələrində bu vəziyyətə kifayət qədər tez-tez rast gəlinir”, – deyə həkim qeyd edib.

Dr. Üzeyir Rəhimov bildirib ki, yalnız ayaqlarda keyimə olduğu üçün xəstənin dərhal damar müayinələrinə və invaziv prosedurlara yönləndirilməsi düzgün yanaşma deyil.

Onun sözlərinə görə, bəzi hallarda xəstələr təşvişə düşərək dopler müayinəsinə, hətta ayaq damarlarının angioqrafiyasına yönləndirilir. Daha sonra isə zərurət olmadığı halda damarlara balon və stent tətbiq edilə bilər.

Həkim vurğulayıb ki, ayaqda yara, qanqrena, ciddi ağrı və digər damar çatışmazlığı əlamətləri yoxdursa, sadəcə yüngül keyimə şikayəti zamanı nevroloqun müayinəsindən keçmək daha məqsədəuyğun ola bilər.

Ayaq damarlarında tutulmanın əsas əlaməti nədir?

Kardioloq ayaq damarlarında ciddi qan dövranı pozğunluğunun əsas əlamətlərindən biri kimi “fasiləli axsama”nı göstərib.

“Belə xəstələr müəyyən məsafə, məsələn, 200-300 metr getdikdən sonra ayaqlarında, xüsusilə baldır və bud nahiyəsində güclü ağrı və ağırlıq hiss edirlər. Hərəkəti davam etdirə bilmədikləri üçün dayanmağa məcbur olurlar. Bir qədər istirahət etdikdən sonra isə yenidən yeriməyə başlayırlar”, – deyə mütəxəssis bildirib.

“Qanqrena və yaralar zamanı vəziyyət fərqlidir”

Həkim qeyd edib ki, ayaq barmaqlarında qanqrena, sağalmayan yaralar, dəri dəyişiklikləri və ya ciddi ağrı müşahidə olunursa, bu zaman damar problemi ehtimalı daha ciddi qiymətləndirilməlidir.

“Əgər ayaqda yara, qanqrena və ya digər ciddi dəyişikliklər yoxdursa, yalnız yüngül keyiməyə görə ayaq angioqrafiyası aparılması düzgün deyil. Belə hallarda ilk növbədə şikayətin səbəbi müəyyənləşdirilməlidir”, – deyə Dr. Üzeyir Rəhimov əlavə edib.

Mütəxəssis diabetli şəxslərə ayaqlarda yaranan hər bir hissiyyat dəyişikliyinə laqeyd yanaşmamağı, lakin özbaşına damar müdaxiləsinə qərar verməməyi tövsiyə edib.

Nigar

Həmçinin oxuyun

Əvəz Zeynallı VƏFAT ETDİ 

Milli Hidrometeorologiya Xidməti bu tarixdə Azərbaycana qar yağacağını AÇIQLADI

Müharibə belə başlayıbmış   —  Canlı şahid tükürpədici HADİSƏNİ  DANIŞDI

Avromobilinə bunu yapışdıran sürücü cərimə oluna bilərmi? —  EKSPERT AÇIQLADI