Mədəaltı vəzi xərçənginin ilkin əlamətləri hansılardır? — Həkimdən AÇIQLAMA  

Müasir tibbin ən aktual və ciddi problemlərindən biri də bədxassəli şişlərin vaxtında aşkar edilməsidir. Xüsusilə "səssiz qatil" olaraq xarakterizə edilən mədəaltı vəzi xərçəngi, ilkin mərhələlərdə demək olar ki, heç bir kəskin simptom vermədən inkişaf edə bilir. Bu səbəbdən bir çox xəstə həkimə müraciət etdikdə artıq xəstəlik sonrakı mərhələlərə keçmiş olur. Lakin orqanizmdə baş verən kiçik dəyişikliklərə qarşı diqqətli olmaq və həyəcan siqnallarını vaxtında duymaq həyat qurtarır. Erkən diaqnoz sayəsində bu amansız xəstəliyə qarşı mübarizədə effektiv nəticələr əldə etmək tamamilə mümkündür.

Mövzu ilə bağlı Oxu24.com-a danışan ümumi və transplantasiya cərrahı Dr. Lalə İsmayılova mədəaltı vəzi xərçənginin gizli əlamətləri, risk faktorları və erkən diaqnozun önəmindən bəhs edib.

Həkim bildirib ki, xəstəliyi erkən mərhələdə aşkar etmək çətin olsa da, mümkündür və ilkin olaraq orqanizm müəyyən siqnallar verir:

•Həzm problemləri və köp: Daimi xarakter alan köp hissi və həzm çatışmazlığı.

•Gözlərdə saralma: Sarılıq əlamətlərinin, xüsusən də göz bəbəklərində saralmanın müşahidə edilməsi.

•Epikaqstral nahiyədə ağrı: Qarın nahiyəsində başlayan və bəzən belə vuran (şüalanan) ağrılar.

•İştahasızlıq və sürətli arıqlama: Səbəbsiz yerə çəki itirmə və iştahanın kəskin şəkildə azalması.

Dr. Lalə İsmayılovanın sözlərinə görə, bu xəstəliyin yaranmasında bir sıra mühüm risk faktorları rol oynayır:

1.Ailədə (genetik olaraq) diabetin olması,

2.Xəstənin özündə şəkərli diabetin mövcudluğu,

3.Xroniki pankreatit keçirilməsi,

4.Tütün (siqaret) çəkmə və piylənmə (obezlik),

5.Yüksək miqdarda yağlı qidaların mütəmadi qəbul edilməsi.

“Pankreas (mədəaltı vəzi) xərçəngini erkən aşkar etmək bir qədər çətin olsa da, müasir müayinə metodları ilə bu əlamətlərə əsasən xəstəliyi öncədən müəyyən etmək olur. Vaxtında qoyulan diaqnoz isə birbaşa həyat qurtarır”,- deyə həkim sonda əlavə edib.

Çimnaz

Həmçinin oxuyun

Pensiyalar 9,3 faiz indeksləşdirilərək artırılıb  —  RƏSMİ AÇIQLAMA

SON DƏQİQƏ! Milli Məclis mühüm qərarlar qəbul edib 

Azərbaycan Lideri Şuşadan hansı mesajları verib? — Mötəbər tədbirin incə MƏQAMLARI

Şuşa Media Forumunda Prezidentin yanında diqqətçəkən xanım kimdir? - FOTOLAR