Asma xəstələrinin ən böyük səhvi nədir?  

Asma xəstələrinin ən çox yol verdiyi yanlışlardan biri xəstəliyin əsas müalicəsini almadan yalnız boğulma zamanı salbutamol və ya ventolin tərkibli inhalyatorlardan istifadə etmələridir. 

Bu barədə allerqoloq Gülnar Quliyeva Oxu24.com-a açıqlamasında danışıb.

Həkimin sözlərinə görə, bir çox pasiyentlər uzun illər ərzində yalnız nəfəs darlığı yarandıqda inhalyatordan istifadə etməklə xəstəliyi nəzarətdə saxladıqlarını düşünsələr də, əslində bu yanaşma düzgün deyil və gələcəkdə daha ciddi problemlərə səbəb ola bilər.

“Pasiyentlər tez-tez bildirirlər ki, ‘Doktor, mənim asma xəstəliyim var və yalnız boğulanda salbutamol istifadə edirəm’. Təəssüf ki, asma xəstələrinin ən çox etdiyi səhv məhz budur. Xəstəliyin özünü müalicə etmədən yalnız simptomları aradan qaldırmağa çalışmaq düzgün yanaşma deyil”, – deyə həkim vurğulayıb.

Gülnar Quliyeva qeyd edib ki, bu vəziyyəti hər gün baş ağrısı yaşayan, lakin səbəbi araşdırmadan davamlı olaraq ağrıkəsici qəbul edən insanlarla müqayisə etmək olar:“Necə ki, insan hər gün baş ağrısını sadəcə ağrıkəsici ilə aradan qaldırırsa, amma problemin kökünü müalicə etmirsə, eyni şəkildə asma xəstələri də yalnız salbutamoldan istifadə etməklə xəstəliyin əsas səbəbini aradan qaldırmırlar. Bu preparatlar müvəqqəti rahatlıq yaratsa da, asmanın müalicəsi hesab edilmir”.

Allerqoloq bildirib ki, salbutamol və ventolin tərkibli dərmanlar bronxların divarında yaranan spazmı aradan qaldıraraq nəfəs almağı asanlaşdırır və boğulma tutmasını idarə edir. Lakin həmin preparatlar tənəffüs yollarında mövcud olan xroniki iltihabi prosesi müalicə etmir.

“Salbutamol asmanı sağaltmır. O, yalnız bronxlarda yaranan spazmı aradan qaldıraraq xəstənin nəfəsini açır və boğulma epizodunu nəzarət altına alır. Əsas müalicə isə xəstəliyin kökündə duran iltihabi prosesin qarşısını almağa yönəlməlidir”, – deyə o əlavə edib.

Həkim vurğulayıb ki, müasir tibbdə asmanın müalicəsində əsas məqsəd xəstənin gündəlik həyatını məhdudiyyət olmadan davam etdirməsinə nail olmaqdır:“Biz istəyirik ki, pasiyent gecələr öskürək və nəfəs darlığı ilə oyanmasın, gündəlik fəaliyyətlərini rahat şəkildə yerinə yetirsin, idmanla məşğul ola bilsin və hər an yanında salbutamol axtarmaq məcburiyyətində qalmasın. Doğru və davamlı müalicə alan xəstələrdə boğulma tutmalarının sayı minimuma enir, bəzi hallarda isə tamamilə aradan qalxır”.

Gülnar Quliyeva asma xəstələrinə özbaşına müalicədən çəkinməyi, mütləq həkim nəzarətində müayinədən keçərək fərdi müalicə planı müəyyənləşdirməyi tövsiyə edib.

“Əgər düzgün diaqnoz qoyular və müasir müalicə protokollarına uyğun terapiya aparılarsa, xəstə nə tez-tez boğulma yaşayacaq, nə də daim salbutamoldan asılı vəziyyətdə qalacaq. Unutmaq olmaz ki, salbutamol və ventolin asmanı müalicə etmir, onlar yalnız boğulma tutmalarını müvəqqəti olaraq idarə edən yardımçı vasitələrdir”, – deyə allerqoloq fikrini yekunlaşdırıb.

Nigar 

Həmçinin oxuyun

7 %-ə qədər qaldırılır  -  2027-ci ilin büdcə zərfinə daxil edildi

Məktəblərdə 7 gün dərs olmayacaq- TARİXLƏR

10 noyabrla bağlı XƏBƏRDARLIQ

34 yaşlı general haqqında YENİ XƏBƏR