"Mübariz Mənsimovun hərəkətlərinə görə Azərbaycan məsuliyyət daşımır" — Lənkəranın deputatından  REAKSİYA

Milli Məclisin 73 saylı Lənkəran şəhər dairəsindən seçilmiş deputatı, professor Rüfət Quliyev Palmali Şirkətlər Qrupunun rəhbəri, azərbaycanlı iş adamı Mübariz Mənsimovun həbs edilməsinə münasibət bildirib.

Deputat Demokrat.az-a açıqlamasında deyib ki, bir sıra şəxslər tərəfindən Mübariz Mənsimovun həbsinin siyasiləşdirlməsi doğru hal deyil:

"Əgər Mübariz Mənsimovun Türkiyədə dövlət və ya hökumətlə problemi varsa, buna görə başqa ölkədə "sifarişçi" axtarmaq gülünc məsələdir. Türkiyə müstəqil bir dövlətdir, müstəqil məhkəmə sistemi var. Düşünürəm ki, əgər Mübariz Mənsimovun günahı yoxdursa, onu tezliklə azadlığa buraxacaqlar. Yox, əgər qanunu pozubsa, o zaman qanunla da cəzasını çəkəcək. 

Yenə deyirəm ki, onun həbsi ilə bağlı Rusiya və Azərbaycanın adının hallandırılması gülünc məsələlərdir. Mübariz Mənsimov Azərbaycan vətəndaşı deyil və onun hərəkətlərinə görə Azərbaycan dövləti məsuliyyət daşımır. Bütün bunlar da aparılan istintaq prosesi nəticəsində bilinəcək".    

R.Quliyev qeyd edib ki, Mübariz Mənsimov Azərbaycanda və regionda kifayət qədər tanınan və imkanı olan iş adamıdır:

"Onun kifayət qədər güclü vəkilləri də var. Əgər onun təqsiri yoxdursa, bu, sübuta yetiriləcək və ədalət bərqərar olunacaq. Ancaq onun həbsini bu formada siyasiləşdirmək də doğru deyil".