Amerikanın Feysbuk şirkəti eyniadlı sosial şəbəkədən və ona aid instaqramdan İran İslam İnqilabı Keşikçiləri Korpusunun (SEPAH) xüsusi təyinatlı “Qüds” Qüvvələrinin komandanı olmuş general Qasım Süleymanini dəstəkləyən qeydləri silir.

Oxu24.com   xəbər verir ki, bu barədə “CNN” telekanalına şirkətin nümayəndəsi məlumat verib.

Feysbukdan bildirilib ki, onlar ABŞ-ın sanksiya şərtləri əsasında işləyirlər. Mənbənin sözlərinə görə, bəzi məhdudiyyətlər ABŞ-ın İslam İnqilabı Keşikçiləri Korpusunun komandanlığına münasibəti ilə əlaqədardır. Qeyd olunur ki, ABŞ-ın “qara siyahı”sında olan şəxsləri tərifləyən və ya hərəkətlərini davam etdirməyə çağıran şəxslərin hesabları silinir.

Telekanalın məlumatına görə, İranda sosial şəbəkələri boykot etməyə çağırışlar edilib və hesabın silinməsi ilə bağlı şikayətlər üçün hökumət saytında bölmə yaradılıb. Qeyd olunur ki, İslam Respublikasında feysbuk və tvitterə giriş qadağası da daxil olmaqla, ötən ilin noyabrında internet bağlanıb.

Xatırladaq ki, yanvarın 3-də Bağdad Hava limanının raket zərbələrinə məruz qalması nəticəsində İran İnqilab Keşikçiləri Korpusunun “Qüds” Xüsusi Qüvvələrinin rəhbəri general Qasım Süleymani və İranın himayədarlıq etdiyi Xalq Səfərbərlik Qüvvələrinin (XSQ) komandan müavini Əbu Mehdi əl-Mühəndisi öldürülüb.

Q. Süleymaninin yanvarın 7-də dəfn edilməsi nəzərdə tutulsa da, mərasimdə izdiham yaşandığından təxirə salınmışdı. Belə ki, izdiham nəticəsində 78 nəfər ölmüş, 213 nəfər xəsarət almışdı. Ona görə də iranlı general yanvarın 8-də dəfn edilmişdi.