“Azərbaycan–Qırğızıstan müttəfiqliyi TDT-də yeni təhlükəsizlik mərhələsi yaradır” –  TƏHLİL  

Azərbaycan ilə Mərkəzi Asiyanın türk dövlətləri, xüsusilə Qırğızıstan Respublikası arasında əlaqələr son illərdə keyfiyyətcə yeni mərhələyə qədəm qoyub. İki ölkə arasında ənənəvi dostluq bağları son beş ildə ardıcıl olaraq strateji tərəfdaşlıq səviyyəsindən müttəfiqlik zirvəsinə yüksəlib.

Bu xüsusda, dövlət başçılarının qarşılıqlı səfərləri və imzalanan strateji sənədlər əməkdaşlığın hüquqi-siyasi baza təməlini daha da möhkəmləndirib. İqtisadiyyat, ticarət dövriyyəsinin artması, nəqliyyat-logistika dəhlizləri və birgə investisiya şirkətlərinin yaradılması bu tərəfdaşlığın praktiki nəticələridir.

Eyni zamanda, mədəni-humanitar istiqamətlərdə həyata keçirilən layihələr xalqlarımız arasında mənəvi bağları daha da sıxlaşdırır. Bütün bu uğurlu dinamika fonunda hərbi, müdafiə və təhlükəsizlik sahələrində qurulan sıx əməkdaşlıq xüsusi strateji əhəmiyyət kəsb edir. Məhz bu kontekstdə Azərbaycan-Qırğızıstan müttəfiqliyinin Türk Dövlətləri Təşkilatı (TDT) çərçivəsində təhlükəsizlik arxitekturasına necə təsir edəcəyi geniş müzakirə mövzusudur. Baş verən bu geosiyasi prosesləri və inteqrasiya addımlarını qiymətləndirən politoloq Oqtay Qasımov Oxu24.com-a  açıqlamasında mövzu ilə bağlı ətraflı fikirlərini bölüşüb.

Mövzunun aktuallığını və iki ölkə arasındakı strateji gedişatları  Oxu24.com-a şərh edən politoloq Oqtay Qasımov bildirib ki, Azərbaycan-Qırğızıstan münasibətləri son illərdə sürətli inkişaf yolu keçərək müttəfiqlik səviyyəsinə çatıb.

Politoloq qeyd edib ki, son 5 ildə Azərbaycan və Qırğızıstan arasında münasibətlər sürətlə inkişaf edərək əvvəlcə tərəfdaşlığa, daha sonra strateji tərəfdaşlığa və nəhayət, ən yüksək səviyyə olan müttəfiqlik səviyyəsinə yüksəlmişdir:

“Qırğızıstan Respublikası bu müttəfiq ölkələrdən biridir. Bir müddət öncə Azərbaycan Prezidentinin Qırğızıstana həyata keçirdiyi səfər zamanı iki ölkə arasında müttəfiqlik münasibətlərinə dair mühüm memorandum imzalanmışdır. Bu sənəd əlaqələrin gələcək inkişafı üçün möhkəm zəmin yaradır”.

O vurğulayıb ki, ölkələr bir çox müxtəlif sahələr üzrə əlaqələri fəal şəkildə genişləndirirlər:

Ticarət dövriyyəsi: İkitərəfli ticarət əlaqələrində dövriyyə artmaqdadır.

Birgə investisiyalar: Tərəflər arasında birgə investisiya şirkətlərinin yaradılması əlaqələrin inkişafına mühüm töhfə verir.

Logistika və nəqliyyat: Qırğızıstanla logistika, nəqliyyat, eləcə də enerji istiqamətlərində sıx işlər aparılır.

Humanitar və mədəni sahələr: Digər sahələrlə yanaşı, mədəniyyət və humanitar istiqamətlərdə də əməkdaşlıq uğurla davam etdirilir.

Oqtay Qasımovun sözlərinə görə, qarşıda duran ən vacib istiqamətlərdən biri məhz təhlükəsizlik və müdafiə sahəsində münasibətlərin daha da inkişaf etdirilməsidir. Türk dövlətləri arasında bu münasibətlərin dərinləşməsi, xüsusilə hərbi-texniki və təhlükəsizlik sahəsində əməkdaşlığın genişlənməsi mühüm əhəmiyyət daşıyır.

Politoloq hesab edir ki, ikitərəfli müstəvidə hərbi-texniki və təhlükəsizlik sahələrində əlaqələrin inkişafı bütövlükdə Türk Dövlətləri Təşkilatının inkişafı üçün çox önəmlidir formatdır. Türk dövlətlərinin bir-biri ilə münasibətlərinin dərinləşməsi TDT-nin daha güclü və beynəlxalq nizamda mühüm rola malik olan bir formata çevrilməsinə güclü təsir göstərən əsas amildir. Bu baxımdan, ayrı-ayrı Türk dövlətlərinin ikitərəfli əsasda qurduqları sıx bağlar təşkilatın ümumi potensialını daha da artırır.

Çimnaz Telmanqızı

Həmçinin oxuyun

Azərbaycan qazı Ermənistan bazarına çıxarıla bilərmi? – İqtisadçıdan açıqlama

Daha çox pensiya almaq üçün nə etməliyik?  — İqtisadçı açıqladı

Sentyabrda pensiya gözləyənlərə ŞAD XƏBƏR

Üç BÜRCƏ sentyabrın 27-nə qədər pul və uğur zəmanəti