Sahibə Qafarova Serbiyaya gedir: Bakı Balkan regionunda yeni diplomatik xətt açır – Politoloq şərh edir  

Milli Məclisin sədri Sahibə Qafarova Serbiyanın paytaxtı Belqrad şəhərinə rəsmi səfər edəcək. Balkan bürosunun verdiyi məlumata görə, parlament sədri 31 avqust - 1 sentyabr tarixlərində keçiriləcək Qoşulmama Hərəkatının beynəlxalq konfransında Azərbaycanı təmsil edəcək. Mühüm tədbirdə iştirak Bakı ilə Belqrad arasında mövcud olan strateji tərəfdaşlıq münasibətlərinin daha da dərinləşməsinə xidmət edəcək. Səfər çərçivəsində keçiriləcək görüşlər parlamentlərarası dialoqun keyfiyyətcə yeni müstəviyə qaldırılması baxımından xüsusi əhəmiyyət daşıyır. Eyni zamanda, bu beynəlxalq platforma Azərbaycanın ümumilikdə Balkan regionu dövlətləri ilə iqtisadi və siyasi əlaqələrini genişləndirmək imkanlarını artırır. Yüksək səviyyəli təmaslar regionda sülh, sabitlik və çoxşaxəli əməkdaşlıq təşəbbüslərinin dəstəklənməsinə yeni təkan verəcək.

Mövzu ilə bağlı Oxu24.com-a açıqlama verən politoloq Ramiyə Məmmədova bildirib ki, Milli Məclis sədrinin Belqrad səfəri və Qoşulmama Hərəkatı çərçivəsindəki iştirakı regionda parlament diplomatiyasının güclənməsi baxımından strateji gedişdir:

"Qoşulmama Hərəkatının Belqrad iclasında Azərbaycanın yüksək səviyyədə təmsil olunması ölkəmizin beynəlxalq arenada artan rolunun bariz göstəricisidir. Azərbaycan uzun müddətdir ki, bu təşkilat çərçivəsində fəal mövqe nümayiş etdirir, öz siyasi prioritetlərini və qətiyyətli addımlarını uğurla dünya ictimaiyyətinə çatdırır”.

Onun sözlərinə görə, Parlamentlərarası münasibətlərin inkişafı yalnız diplomatik təmaslarla bitmir; bu, həm də iqtisadi və siyasi sahələrdə yeni tərəfdaşlıq platformalarının yaranmasına gətirib çıxarır. Sahibə Qafarovanın Belqraddakı təmasları, səsləndirəcəyi bəyanatlar və aparacağı fikir mübadilələri parlamentlər səviyyəsində qarşılıqlı dəstəyi daha da möhkəmləndirəcək.

Politoloq qeyd edib ki, səfərin əhəmiyyəti təkcə Serbiya ilə ikitərəfli əlaqələrlə məhdudlaşmır. Bu təmaslar Şimali Makedoniya və digər Balkan ölkələri ilə də dialoqu genişləndirməyə, yeni regional layihələr üçün imkanlar açmağa zəmin yaradır:

“Bütövlükdə, Azərbaycanın Balkan regionunda yürütdüyü parlament diplomatiyası gələcək çoxşaxəli əməkdaşlıq üçün etibarlı bünövrə formalaşdırır”. 

Çimnaz Telmanqızı

Həmçinin oxuyun

Onu DTX tutubmuş — YENİ DETALLAR ÜZƏ ÇIXDI

Pensiya və müavinətlərlə bağlı AÇIQLAMA 

Köçəryanı həbs edən Paşinyan nəyə hazırlaşır? — Azərbaycanlı politoloq şok faktları AÇIQLADI

SON DƏQİQƏ! Yüksək vəzifələrə təyinatlar baş tutdu