Ukraynanın enerji təhlükəsizliyində Azərbaycan amili: "Əməkdaşlıq hər iki tərəf üçün faydalıdır"   

Ukraynada davam edən müharibə və regional münaqişələr fonunda ölkənin enerji təhlükəsizliyinin təmin olunmasında Azərbaycanla əməkdaşlıq məsələsi xüsusi aktuallıq kəsb edir. Dağıdılmış neft emalı zavodları və qarşıdan gələn soyuq aylar Ukraynanın yanacaq ehtiyacını artırır ki, bu da strateji tərəfdaşlarla əlaqələri gücləndirməyi zəruri edir. Azərbaycan müharibənin ilk günlərindən Ukraynaya dəstək verərək dizel və benzin tədarükünü həyata keçirən əsas ölkələrdəndir. Müharibədən sonrakı dövrdə isə mövcud logistik infrastrukturlardan, məsələn, "Odesa-Brodi" boru kəmərindən istifadə etməklə Azərbaycan neftinin Ukrayna üzərindən Avropaya nəqli perspektivləri diqqət mərkəzindədir. Bu əməkdaşlıq həm Azərbaycan üçün ixrac marşrutlarının diversifikasiyası, həm də Ukrayna üçün tranzit gəlirləri baxımından mühüm əhəmiyyət daşıyır.

Mövzu ilə bağlı Oxu24.com-a açıqlama verən ukraynalı politoloq Maksim Yali bildirib ki, qısamüddətli və ortamüddətli perspektivdə, Rusiya ilə genişmiqyaslı müharibə və Yaxın Şərqdə davam edən münaqişə şəraitində Azərbaycan Avropada payız-qış mövsümündə gözlənilən kəsiri örtmək üçün yanacaq, dizel və benzin tədarükünü artıra bilər. 

Onun sözlərinə görə, nəzərə alsaq ki, Ukraynanın neft emalı zavodları dağıdılıb, Azərbaycanın bu dəstəyi çox ciddi köməkdir:

“Azərbaycan genişmiqyaslı işğalın əvvəlindən bu yardımı göstərir. Enerji təhlükəsizliyi hər iki tərəf üçün əməkdaşlığın inkişaf etdirilməsinin faydalı və sərfəli olduğu əsas istiqamətdir”.

Politoloq qeyd edib ki, müharibə başa çatdıqdan sonra daha uzunmüddətli, strateji planlardan danışsaq, yeni marşrutların çəkilməsi dəfələrlə müzakirə olunub:

“XXI əsrin əvvəllərindən gündəmdə olan 'Odesa-Brodi' layihəsini misal göstərmək olar: neftin Odesaya çatdırılması və oradan Ukrayna logistikasından istifadə edilərək Azərbaycanın Avropa ölkələrinə tədarükünü artırmaq üçün tranzit olunması. Bu, artıq mövcud olan bir infrastrukturdur. Sülh dövründə, o cümlədən durulaşdırılmış qaz (LNG) terminallarının tikintisi şəraitində bu istiqaməti inkişaf etdirmək olar. Bu, Azərbaycan üçün tədarük marşrutlarını diversifikasiya edəcək, Ukrayna isə öz logistikasından gəlir əldə edə biləcək”,- deyə Maksim Yali vurğulayıb. 

Çimnaz Telmanqızı

Həmçinin oxuyun

Əraziyə polis əməkdaşları cəlb olunub:Ölən var

Azərbaycana ilk qar yağacaq — Bu tarixdə 

Pensiyalarla bağlı ŞAD XƏBƏR: bu qədər artım olacaq – Nazirlikdən AÇIQLAMA 

Nazir Abid Şərifovun qardaşı oğlunu təqaüdə göndərdi (FOTO)