Milli Məclis Avropa Parlamenti ilə yolları ayırır – Deputatdan BƏYANAT: "Bu qurum Ermənistanın vəkilinə çevrilib"  

Oxu24.com xəbər verir ki, Azərbaycan ilə Avropa Parlamenti arasındakı münasibətlər kritik həddə çatıb. Milli Məclis tərəfindən bu qurumla bütün istiqamətlər üzrə əlaqələrin dayandırılması və əməkdaşlığa son qoyulması məsələsi gündəmə gətirilib. Rəsmi Bakının bu qətiyyətli addımı Avropa Parlamentinin illərdir davam edən qərəzli, birtərəfli və beynəlxalq hüququn prinsiplərinə zidd fəaliyyətinə cavab xarakteri daşıyır.

Mövzu ilə bağlı Oxu24.com-a açıqlama verən Milli Məclisin deputatı Samir Vəliyev bildirib ki, Avropa Parlamentinin qəbul etdiyi son sənədlər bu təşkilatın artıq obyektivliyini tamamilə itirdiyini sübut edir.

Deputat vurğulayıb ki, Avropa Parlamenti Azərbaycanın Qarabağ üzərində öz suverenliyini təmin etməsini və separatizmin kökünü kəsməsini həzm edə bilmir:

“44 günlük Vətən müharibəsində qazanılan tarixi zəfərdən sonra bu təşkilatın ölkəmizə qarşı qəbul etdiyi qərəzli qətnamələrin, belə demək mümkünsə, sayı-hesabı yoxdur. Görünən odur ki, Avropa Parlamenti hər zaman Ermənistanın “vəkili” rolunda çıxış edir. Təşkilatın “Ermənistanda demokratik dayanıqlığın dəstəklənməsi” adlı qətnaməsi də məhz bu ölkəyə, xüsusən də seçki ərəfəsində Paşinyan hakimiyyətinə xidmət edən bir siyasi sifarişdir”.

“Avropa dəyərləri lobbi maraqlarına qurban verilir"

S.Vəliyev qeyd edib ki, müasir Avropa təsisatları yarandıqları dövrdə bəyan etdikləri fundamental prinsiplərdən – insan haqları və beynəlxalq hüquqdan uzaqlaşıblar. Hazırda bu qurumlar müəyyən beynəlxalq güclərin və erməni lobbisinin diqtəsi ilə hərəkət edir:

“Bu gün Avropa dəyərlərinin aşınmaya məruz qalması təəssüf doğurur. Avropa Parlamenti artıq islamofob və türkəfob dairələrin əlində bir alətə çevrilib. Onların qəbul etdiyi kağız parçalarının Azərbaycan üçün heç bir hüquqi qüvvəsi yoxdur. Ermənistanın 30 illik işğalı dövründə 1 milyona yaxın qaçqın və köçkünün hüquqlarını görməzdən gələnlərin bu gün bizə “demokratiya” dərsi keçməyə mənəvi haqqı yoxdur”.

Həmçinin oxuyun

Azərbaycanda  YENİLİK: Bu şəxslər də rəhbər vəzifəyə gətirilə bilər  

SON DƏQİQƏ! Bakıya uçan təyyarə təcili bu ölkəyə endi

Milli Məclis Avropa Parlamenti ilə yolları ayırır – Deputatdan BƏYANAT: "Bu qurum Ermənistanın vəkilinə çevrilib"  

Tahir Gözəl festivalda ona çay verənə 50 manat bəxşiş verdi - Video 

“Uduzan tərəf Azərbaycan olmayacaq"

Münasibətlərin kəsilməsinin Azərbaycanın beynəlxalq imicinə zərər vura bilməyəcəyini deyən deputat, keçmiş təcrübələri xatırladıb:

“Təcrübə göstərir ki, münasibətlərin pozulmasında uduzan tərəf Azərbaycan deyil. Məsələn, AŞPA-nın qərəzli mövqeyindən sonra əməkdaşlığı dayandırdıq. Nəticədə AŞPA nə qazandı? Əlbəttə ki, heç nə. Eyni proses Avropa Parlamentinə də şamil olunacaq. Avropa İttifaqı və Avropa Komissiyası rəsmi Bakı ilə əməkdaşlığa böyük önəm verdiyi bir vaxtda, parlamentin bu mövqeyi tamamilə yanlışdır”.

Samir Vəliyev sonda təklif edib ki, Azərbaycan parlamenti həm Avropa Parlamenti, həm də Avronest Parlament Assambleyası ilə əməkdaşlığı tamamilə və rəsmən dayandırmalıdır, çünki bu təşkilatların ölkəmizə qarşı dəyişməyən qərəzli yanaşması hər hansı konstruktiv dialoqu qeyri-mümkün edir.

Çimnaz Telmanqızı