Balakəndə qırmızı kitaba düşən qonur ayı balalarını satmaq istəyən Şəki sakinləri yaxalanıb.

APA TV-nin məlumatına görə, rayon Polis Şöbəsinə daxil olmuş məlumat əsasında aparılan əməliyyat zamanı Şəki şəhər sakini Vasif Əhmədovun idarə etdiyi “Ford” markalı yük maşını saxlanılıb.

Avtomobilin yük yerinə baxış zamanı oradan qırmızı kitaba düşən Qonur Qafqaz ayısının iki balası aşkar edilib.

Məlum olub ki, Şəki şəhər sakinləri Fazil Sadıqov və Anar Abdullayev həmin ayı balalarını satmaq üçün Balakən rayonuna gəliblər. 

Hər üç şəxs polis əməkdaşları tərəfindən saxlanılaraq şöbəyə aparılıb.

İlkin araşdırma zamanı məlum olub ki, Anar Abdullayev və Fazil Sadıqov bir müddət əvvəl dağlıq meşəlik əraziyə yarpaq yığmağa gedən zaman körpə ayı balalarını tapıblar.

Həmin şəxslər barəsində İnzibati Xətalar Məcəlləsinin müvafiq maddəsi ilə protokol tərtib edilib. Faktla bağlı araşdırma aparılır.