Sui-qəsdin pərdəarxası: ABŞ iranlı generalı niyə öldürdü? – Şok detallar

ABŞ və İran arasındakı gərginliyin qarşılıqlı hücumlara çevrilməsinə Kərkükdəki hücumda bir amerikalı hərbi qulluqçunun həlak olması səbəb olub.

Teleqraf.com xəbər verir ki, dekabrın 27-də ABŞ-ın Kərkükdəki hərbi bazasına edilən hücum nəticəsində bir nəfər həlak olub, 6 nəfər yaralanıb.

Həmin şəxsin ölümü ABŞ və İran arasındakı son gərginliyin başlanğıcı hesab olunur. Təsadüfi deyil ki, hadisədən bir gün sonra Pentaqon “Həşdi Şabi” terror təşkilatına bağlı “Hizbullah Birqadası”nın İraqdakı 5 hərbi düşərgəsinə hücuma keçmək haqda qərar verdi. Hücum nəticəsində “Həşdi Şabi”nin 19 terrorçusu öldürüldü, 35 üzvü isə yaralandı.

ABŞ-ın bu həmləsinə etiraz edən “Həşdi Şabi” və təşkilat tərəfdarları yanvarın 1-də Amerikanın İraqdakı səfirliyi qarşısında kütləvi etiraz aksiyalarına başladı. Prezident Donald Tramp səfirliyin binasına silahlı hücumlarla müşayiət olunan aksiyalara görə İranı ittiham etdi.

Qarşılıqlı gərginliyin davam etdiyi vaxt Amerikanın nüfuzlu media qurumlarısəfirliyə hücumun İranın Qüds Briqadasının komandanı Qasım Süleymani tərəfindən həyata keçirilməsi haqda məlumatlar yaydı. Bundan sonra sui-qəsd planını işə salan ABŞ Qasım Süleymani də daxil olmaqla, “Həşdi Şabi” liderinin köməkçisi Əbu Mehdi Mühəndis və 8 nəfərin həyatına son qoydu.

Süleymaninin qətlindən sonra İraq parlamentinin ABŞ qüvvələrini ölkədən çıxarmasına yönəlik qərarına adekvat olaraq, İran Amerikanın İraqdakı iki bazasına hücuma keçdi və “qisas” bəyanatları səsləndirdi.

Şimali İraq Kürdv Muxtariyyətinin lideri Məsud Bərzaniyə yaxınlığı ilə tanınan “Rudaw” agentliyinin xəbərinə görə, bütün bu olayların başlanğıcı Kərkükdəki “K1” hərbi bazasına hücumda Növrəs Valid Həmid adlı 33 yaşlı amerikalı hərbçinin həyatını itirməsi olub.

Amerika mediası ABŞ ordusunda tərcüməçi kimi xidmət edən Həmidin İraq əsilli ABŞ vətəndaşı olduğunu yazıb. Onun 2011-ci ildə həyat yoldaşı Nur əl-Xali ilə ABŞ-a köçdüyü, 2017-ci ildə vətəndaşlıq aldığı bildirilib.

İki azyaşlı övladı olan Növrəs və Nur Sakramento şəhərində yaşayıb.