Bakıda uşaq evində azyaşlını döyən müəllim işdən çıxarıldı - VİDEO

Bakının Suraxanı rayonunda yerləşən 2 saylı uşaq evində azyaşlını döyən müəllim işdən çıxarılıb. 

Milli.Az xəbər verir ki, vətəndaş Sərkinaz Quliyeva yeniavaz.com-a bildirib ki, oğlu Mirəli Quliyevə məktəbdə direktor və müəllimlər tərəfindən fiziki və psixoloji təzyiqlər göstərilir: "Direktor 11-ci sinif şagirdlərini gətirib onlara balaca uşaqları döydürtdürür".

S.Quliyeva uşaq evində müəllimlərdən birinin 3-5 yaşlı bir oğlan uşağını döyməsinin əks olunduğu videonu da təqdim edib.

Uşaq evinin direktoru Sevda Hacıyeva isə qeyd edib ki, şagird Mirəli Quliyevin psixoloji problemləri var:

"Bir neçə gün əvvəl gecə saat 12-də Mirəlinin tutması tutub, burada bir qızı boğub, biz də "skoru" və polis çağırmışıq. Gəldim gördüm ki, qızı boğub, dırnaqlarının izi qalıb. Nənəni - gecə növbətçisini vurub, burnu gömgöy olub, şişib. Növbətçinin və qızın vurulmasını 33-cü polis bölməsində sənədləşdirilib. Əslində, o uşaq kollektiv içində yaşamamalıdır. Psixi Sağlamlıq Mərkəzinin direktoru Fuad İsmayılov tərəfindən verilən sənəddə bildirilir ki, uşaq 1 saylı Respublika Psixiatriya Xəstəxanasına göndərilməlidir. Anası da deyir ki, guya o sənəd saxtadı və mən hazırlamışam. Bu uşaq tutması tutan zaman bıçaqla bütün qapıları deşik-deşik edib. O, həmin bıçaqla kiməsə xəsarət də yetirə bilərdi. Kadrda isə uşağı vuran müəllim Bakı Şəhər İcra Hakimiyyəti tərəfindən artıq uşaq evindən uzaqlaşdırılıb".

Məsələ ilə bağlı Bakı Şəhər Məktəbəqədər Təhsil Müəssisələri və Uşaq Evləri İdarəsi də məlumat yayıb.

Oxu24.com xəbər verir ki, idarədən Trend-ə verilən məlumata görə, Uşaq bağçaları və Uşaq evlərində sistematik olaraq reydlər və yoxlamalar aparılır, aşkar edilmiş faktlarla bağlı müvafiq tədbirlər görülür.

Bildirilib ki, qeyd edilən hadisə ötən ilin dekabr ayında baş verib. Məsələni araşdıran komissiyanın qərarına əsasən, dekabr ayında müəllimə Elnurə Qüdrət qızı Məmmədova bu və yol verdiyi digər nöqsanlara görə işdən azad olunub.