Qaynar xətt:

(+99450) 247 90 86

Hadisə yerinə baxış nədir?

KRİMİNAL

132

13.05.2025, 17:35

 Əsas istintaq hərəkətlərindən biri də hadisə yerinə baxışdır. Bu istintaq hərəkəti hüquq-mühafizə orqanları tərəfindən cinayət hadisəsinin baş verdiyi ərazidə aparılır və maddi sübutların toplanması, izlərin aşkarlanması və gələcək istintaq üçün mühüm məlumatların qeydə alınması məqsədi daşıyır.

  Hadisə yerinə baxış prosesi kriminalistika elminin prinsipləri və Azərbaycan Respublikasının Cinayət Prosessual Məcəlləsinin müvafiq müddəalarına əsasən həyata keçirilir. Bu baxışın əsas məqsədi – cinayət yerindəki vəziyyətin olduğu kimi sənədləşdirilməsi, sübutların qorunması və istintaqın obyektiv aparılması üçün zəmin yaratmaqdır.

  Proses zamanı zəruri hallarda kriminalistika üzrə ixtisaslaşmış mütəxəssislərin, ekspertlərin iştirakı təmin olunur. Hadisə yerindəki qan izləri, barmaq izləri, alətlər, geyim əşyaları və digər maddi sübutlar xüsusi metodlarla götürülür, qaydalarına uyğun şəkildə qablaşdırılır və sənədləşdirilir.

  Hadisə yerinin ümumi şəraiti isə fotoşəkillər, videoçəkilişlər və sxematik planlarla qeydə alınır. Bu sənədlər istintaq materiallarına əlavə olunaraq sübutların tamlığını və şəffaflığını təmin edir.