Son haqq-hesabdan kimlər məhrum edilə bilməz? Vəkil AÇIQLADI

Bir çox işçi hesab edir ki, əmək müqaviləsinə öz təşəbbüsü ilə xitam verdiyi halda işəgötürən ona son haqq-hesab ödəməyə bilər. Halbuki əmək qanunvericiliyi bu məsələdə işçinin hüquqlarını aydın şəkildə müəyyən edir.

Oxu24.com-a açıqlama verən vəkil Fuad Mirzəzadə bildirib ki, işçi öz ərizəsi ilə işdən ayrılsa belə, bu, onun son haqq-hesab almaq hüququnu aradan qaldırmır.

Onun sözlərinə görə, əmək münasibətlərinə hansı əsasla xitam verilməsindən asılı olmayaraq, işçinin işlədiyi müddət ərzində qazandığı bütün ödənişlər ona tam şəkildə hesablanmalı və ödənilməlidir.

"Əgər işçi öz istəyi ilə əmək müqaviləsinə xitam verirsə, bu halda da ona son haqq-hesab verilməlidir. İşəgötürən işçinin işlədiyi günlər üzrə əməkhaqqını tam hesablamalı və qanunvericiliyin tələblərinə uyğun şəkildə ödəməlidir", – deyə vəkil bildirib.

Fuad Mirzəzadə qeyd edib ki, son haqq-hesab yalnız əməkhaqqından ibarət deyil. İşçinin istifadə etmədiyi əmək məzuniyyəti günləri də nəzərə alınmalı və həmin günlərə görə pul kompensasiyası hesablanmalıdır.

"Əgər işçi əmək fəaliyyəti dövründə məzuniyyət hüququndan tam və ya qismən istifadə etməyibsə, istifadə olunmamış məzuniyyət günlərinə görə ona müvafiq pul kompensasiyası ödənilməlidir. Bu da son haqq-hesabın tərkib hissəsidir", – deyə o vurğulayıb.

Hüquqşünasın sözlərinə görə, bəzi hallarda işəgötürənlər işçinin öz ərizəsi ilə işdən çıxdığını əsas gətirərək son haqq-hesabı gecikdirir və ya tam ödəmirlər. Lakin bu, qanunvericiliyin tələblərinə zidd hesab olunur.

"İşçinin əmək müqaviləsinə hansı səbəbdən xitam verilməsindən asılı olmayaraq, onun qazandığı əməkhaqqı və digər qanuni ödənişlər saxlanıla bilməz. İşəgötürən son haqq-hesabı vaxtında və tam şəkildə ödəməyə borcludur", – deyə vəkil bildirib.

Fuad Mirzəzadə əlavə edib ki, əgər işçi hesab edir ki, ona son haqq-hesab düzgün hesablanmayıb və ya ümumiyyətlə ödənilməyib, bu halda o, hüquqlarının müdafiəsi üçün aidiyyəti dövlət qurumlarına və ya məhkəməyə müraciət edə bilər.

Vəkil sonda işçilərə tövsiyə edib ki, işdən ayrılarkən son haqq-hesab sənədlərini diqqətlə yoxlasınlar, ödənilən məbləğin işlədikləri günlərə və istifadə edilməmiş məzuniyyət günlərinə uyğun hesablandığından əmin olsunlar. Bu, sonradan yarana biləcək əmək mübahisələrinin qarşısının alınması baxımından mühüm əhəmiyyət daşıyır.

Jalə

Həmçinin oxuyun

Kartdan karta səhvən pul göndərilməsi PROBLEMİ: Qanun nə deyir?

Usubovun vəfat edən kürəkəni ilə bağlı FAKTLAR

Oktyabrda pensiya və sosial yardım gözləyənlərə ŞAD XƏBƏR

Ramil Usubova ağır itki: Qəfil VƏFAT ETDİ