POLİTOLOQ: “ABŞ ilə strateji tərəfdaşlıq Azərbaycanın regional mövqeyini gücləndirir”

Prezident İlham Əliyevin Şuşada keçirilən IV Beynəlxalq Media Forumundakı açıqlamaları Azərbaycan-ABŞ münasibətlərində yeni mərhələnin başladığını göstərir. Dövlət başçısının mövcud Vaşinqton administrasiyası ilə əlaqələrin müsbət dinamikasını vurğulaması və "907-ci düzəliş"in heç bir mənfi təsirinin olmadığını bildirməsi regional geosiyasət baxımından mühüm mesajdır. İki ölkə arasında strateji tərəfdaşlıq xartiyasının imzalanması və ABŞ-ın Azərbaycan-Ermənistan sülh prosesində aktiv vasitəçiliyi bu yaxınlaşmanın əsas sütunlarını təşkil edir. Vaşinqtonla münasibətlərin istiləşməsi Bakının Cənubi Qafqazdakı mövqeyini daha da möhkəmləndirir və xarici təzyiqlərə qarşı manevr imkanlarını artırır. Xüsusilə regional təhlükəsizlik və enerji layihələri fonunda bu tərəfdaşlıq Azərbaycanın beynəlxalq nüfuzuna müsbət töhfə verir.

Mövzu ilə bağlı Oxu24.com-a açıqlama verən politoloq Məhəmməd Əsədullazadə bildirib ki, hazırda Azərbaycanla Amerika arasında münasibətlər yüksək səviyyədədir:

"ABŞ-ın Azərbaycan və Ermənistan arasında vasitəçi olması, sülh sənədinin paraflanması, həmçinin Tərəfdaşlıq Layihəsi və ABŞ-Azərbaycan arasında strateji tərəfdaşlıq xartiyasının imzalanması Azərbaycanın Cənubi Qafqazda artıq mövqeyini də kifayət qədər gücləndirib”.

Onun sözlərinə görə, ölkəmiz Amerika kimi super dövlətin dəstəyini alır:

“İndiyə kimi Azərbaycanla Amerika arasında bu səviyyədə əməkdaşlıq olmamışdı. Həmçinin, Amerikada artıq 907-ci düzəlişin də ləğvini Azərbaycan istəyir. Çünki Ermənistanla Azərbaycan arasında iqtisadi əlaqələr bərpa olunur və bu istiqamətdə mühüm işlər həyata keçirilir. Belə olan təqdirdə 907-ci düzəlişin ləğvi də reallaşmalıdır”.

Politoloq qeyd edib ki, hazırda Amerika ilə əməkdaşlıq nəticəsində Azərbaycanın Xəzər regionunda da geosiyasi mövqeyi güclənir:

“Azərbaycanın Amerikanın dövlət dəstəyini qazanması və yeni dünya siyasi nizamında Vaşinqton və Bakı arasındakı münasibətlər regional müstəvidə Azərbaycana digər ölkələrin, xüsusilə Rusiyanın təzyiqlərinin də neytrallaşmasına gətirib çıxaracaq”.

Çimnaz Telmanqızı

Həmçinin oxuyun

Yeni sədr təyin olundu -DOSYE

18 iyulla bağlı XƏBƏRDARLIQ

SON DƏQİQƏ!Əmr imzalandı:Tanınmış şəxs işdən getdi

Zaur Baxşəliyev efirə qayıdır?