Husilər: Amerikanın MQ-9 Reaper pilotsuz təyyarəsi Yəmən üzərində məhv edilib

Ənsar Allahdan olan husi üsyançıları Yəmənin Marib əyaləti üzərində səmada ABŞ-ın MQ-9 Reaper pilotsuz təyyarəsini vurublar.

Oxu24.com  “Al Masirah” kanalına istinadən yazır ki, bu barədə husi silahlı qüvvələrinin nümayəndəsi Yəhya Sariya bildirib.

"Yəmən silahlı qüvvələrinin hava hücumundan müdafiə sistemləri Marib əyalətinin hava məkanında düşmənçilik missiyaları yerinə yetirən Amerikanın MQ-9 pilotsuz təyyarəsini məhv edə bilib", - hərəkatın sözçüsü Husilərə məxsus Al Masirah telekanalında bildirib.

Sarianın sözlərinə görə, bu, Yəmən hava məkanında 72 saat ərzində məhv edilən ikinci MQ-9 Reaper-dir. Husilərin iddiasına görə, üsyançı qüvvələr Yaxın Şərqdə eskalasiya başlayandan bəri ABŞ-ın bu tipli 14 pilotsuz təyyarəsini vurub.

Qəzza zolağında münaqişənin şiddətlənməsindən sonra Ənsar Allah xəbərdarlıq edib ki, Fələstin anklavında əməliyyatlar dayandırılana qədər İsraili atəşə tutacaq və əlaqəli gəmilərin Qırmızı dəniz və Bab əl-Məndəb boğazı sularında üzməsinə mane olacaq. 2024-cü ilin noyabrından husilər Qırmızı dəniz və Ədən körfəzində onlarla gəmiyə hücum edib.

Buna cavab olaraq ABŞ hakimiyyəti beynəlxalq koalisiyanın yaradıldığını və Qırmızı dənizdə gəmiləri qorumaq üçün “Rifahın keşikçisi” əməliyyatına başladığını elan edib. Bundan sonra Britaniya və ABŞ silahlı qüvvələri mütəmadi olaraq Yəmən əyalətlərində üsyançıların hərbi obyektlərinə zərbələr endirməyə başlayıb.

Bundan əvvəl Yəmənin paytaxtında güclü partlayışlar baş verib.

 

Nigar