Xorvatiya Macarıstanın bəyanatından hiddətlənib

Euractiv xəbər verir ki, Macarıstan Xarici İşlər Nazirliyi rəhbərinin Xorvatiyanın neft tranziti üçün etibarsız ölkə olması ilə bağlı bəyanatı Zaqrebdə hiddət yaradıb.

Avropa Komissiyası Macarıstan və Slovakiyaya Xorvatiyadakı JANAF Adriatik boru kəmərinin ehtiyat gücündən hər iki ölkəni Rusiyadan olmayan neftlə təmin etmək üçün istifadə etməyi təklif edib. Lakin Macarıstanın xarici işlər naziri Peter Szijyarto “Xorvatiyanın sadəcə olaraq etibarlı tranzit ölkəsi olmadığını” deyərək təklifi rədd edib.

Xorvatiyanın xarici işlər naziri Qordan Qrliç Radman deyib: “Bu, uzun müddətdir ki, xoşagəlməz hərəkətlərinə həddindən artıq təmkin və mülayimliklə cavab verdiyimiz bir ölkənin nümayəndəsindən eşitməyi gözləmədiyimiz siyasi cəhətdən dərin təhqiredici bəyanatdır”.

Slovakiya cümə günü Xorvatiya hökumətindən tədarükün təmin edilməsini təklif edən məktub aldığını bildirib. “Ancaq hansı qiymətə? Nə dərəcədə? Bu gün heç kim bunu bilmir”, - Slovakiyanın xarici işlər naziri Juraj Blanar bildirib.

Slovakiya, Macarıstan kimi, Avropa Komissiyasının Ukraynanı Rusiyadan neft axınını tam bərpa etməyə məcbur etməsini istəyir, lakin Blanarın sözlərinə görə, Avropa Komissiyası hərəkətə keçməsə, o da başqa həll yolu axtaracaq.

Avropa Komissiyası bir gün əvvəl bildirmişdi ki, Ukrayna Rusiyanın “Lukoyl” şirkətindən neftin tranzitini dayandırdıqdan sonra Macarıstan və Slovakiyaya neft tədarükü ilə bağlı vəziyyəti aydınlaşdırmağa davam edir, lakin indiki mərhələdə bu qərarın neftin həcminə təsirini görməyib. 

Macarıstan və Slovakiya Kiyevin qərarının onların enerji təhlükəsizliyini təhdid etdiyini iddia edir və Avropa Komissiyasında müzakirələrə başlayıb.

 

Miri