Müqaviləsiz iş görənlərin diqqətinə: WhatsApp yazışmaları.. — Açıqlama

CƏMİYYƏT

154

11.08.2026, 23:52

Xəbərlərimizi Google-da izləyin

Yeniliklərdən dərhal xəbərdar olun

Bizim millətin ən sevimli adətidir: "Ağsaqqal sözüdür, kişi sözüdür, müqaviləyə neyləyirik?" Deyirik, anlaşılan adamıq, gəl bir tərəfdən başlayaq, sənəd-sünəd sonra həll olar. Sonra da işlər çəp düşəndə, qarşı tərəf "mənim xəbərim yoxdur, mən belə deməmişəm" deyib aradan çıxır. Başlayırıq dizimizə döyməyə ki, axı rəsmi kağızımız yoxdur, indi haqqımızı necə sübut edək?

Vəkil Tural Həsənli məsələ ilə bağlı Demokrat.az-a açıqlamasında bildirib ki, əgər mübahisə mülki xarakterlidirsə, bununla bağlı subyektiv hüquqa malik olan şəxs öz hüququnun və ya qanuni mənafeyinin müdafiəsi məqsədilə iddia ilə birbaşa məhkəməyə müraciət edə bilər.

Onun sözlərinə görə, tərəflər arasında hər hansı mübahisə yarandığı halda, həmin mübahisənin mülki xarakter daşıması və şəxsin pozulmuş və ya mübahisələndirilən hüququnun mövcud olması ona məhkəmə qaydasında müdafiə olunmaq imkanı verir:

“Tərəflər arasında hər hansı rəsmi müqavilənin olmaması isə şəxsin öz tələbini sübut etmək imkanını tamamilə aradan qaldırmır. Belə hallarda iddiaçı öz tələblərini əsaslandırmaq və sübuta yetirmək üçün tərəflər arasında aparılmış WhatsApp yazışmalarından, səsli mesajlardan, maddi sübutlardan, şahid ifadələrindən, foto və video görüntülərdən, eləcə də mübahisənin xarakterindən asılı olaraq digər sübut vasitələrindən istifadə edə bilər. Bu sübutların hər biri ayrı-ayrılıqda və ya digər sübutlarla birlikdə tərəflər arasında münasibətin və mübahisənin mahiyyətinin müəyyənləşdirilməsində əhəmiyyətli rol oynaya bilər.

Bu cür məsələlərdə əsas diqqət tərəflər arasında mövcud olan mübahisə üzrə sübutetmə vasitələrinə yönəldilməlidir. Şəxs yalnız öz tələbinin mövcudluğunu deyil, həmin tələbin hansı faktlara və hallara əsaslandığını da mümkün qədər konkret şəkildə sübut etməlidir. Xüsusilə rəsmi müqavilənin olmadığı hallarda tərəflərin əvvəlki yazışmaları, göndərdikləri səsli mesajlar, ödənişlərlə bağlı məlumatlar, şahid ifadələri və digər materiallar mübahisənin həlli baxımından əhəmiyyət kəsb edə bilər.

Eyni zamanda, hazırda qüvvədə olan qanunvericiliyə uyğun olaraq, tərəflər yaranmış mübahisəni həll etmək üçün mütləq məhkəməyə müraciət etmək məcburiyyətində deyillər. Onlar məhkəməyə müraciət etmədən, əlavə xərc və vaxt itkisinin qarşısını almaq məqsədilə könüllü şəkildə müxtəlif mediasiya təşkilatlarına müraciət edə bilərlər. Mediasiya prosesi vasitəsilə tərəflər arasında mövcud olan mübahisənin daha qısa müddət ərzində qarşılıqlı razılaşma yolu ilə həll edilməsi mümkündür.

Bu baxımdan, mübahisə yarandıqda tərəflərin ilk növbədə mövcud sübutları qoruması və sistemləşdirməsi, daha sonra isə mübahisənin məhkəmə, yaxud mediasiya yolu ilə həllinin hansı variantının onlar üçün daha məqsədəuyğun olduğunu qiymətləndirməsi vacibdir”, - deyə Tural Həsənli fikrini tamamlayıb.

Həmçinin oxuyun