Ölkənin bir nömrəli innovasiya qurumunda qarışıqlıq: Kamran Ağayev də getdi - Nə baş verir?

CƏMİYYƏT

606

27.04.2026, 18:20

İRİA-da nə baş verir?

Kamran Ağayev vəzifəsindən istefa veribmi?

Oxu24.com xəbər verir ki, İnnovasiya və Rəqəmsal İnkişaf Agentliyində son dövrlər müşahidə olunan ardıcıl kadr dəyişiklikləri ciddi suallar yaradır. Qısa müddətdə xeyli sayda peşəkar və ixtisaslı əməkdaşların, departament rəhbərlərinin qurumdan uzaqlaşdığı müşahidə olunur.

Bəzilərinin isə ərizələrinin alındığı bildirilir.

Bu gün öyrəndim ki, nəinki ölkədə, hətta qlobal səviyyədə tanınmış peşəkarlardan biri olan, İRİA-da Data İdarəetməsi Departamentinin rəhbəri Kamran Ağayev də qurumdakı vəzifəsindən istefa verib.

Düzü, anlamaq olmur ki, İRİA-da nələr baş verir.

Bir neçə gün öncə isə bu qurumun HR departamentinə yeni rəhbərin təyin olunduğu bildirilirdi.

Maraqlıdır ki, bir müddət öncə müavin vəzifəsini tutan Rəşad Xalıqov da buradakı işindən ayrılıb.

Ümumiyyətlə, bünövrəsi qoyulandan bu Agentlik bəxti gətirməyən qurumlardan olub.

Biri vardı, möhürü götürüb qaçmışdı.

Biri də vardı, nöqsanlara görə, “padval əməliyyatına görə” işdən azad olunmuşdu, amma bunu “yeni etapın başlanması” kimi xarakterizə etmişdi.

Cənablar, düşünürəm ki, ölkənin bir nömrəli innovasiya qurumunda nələrsə düz getmir.

Xüsusilə innovasiya, startap ekosistemi və rəqəmsal inkişaf kimi sahələrdə peşəkarlara diqqət yetirmək lazımdır.

Onsuz da ölkədə son vaxtlar peşəkar kadrlar tapmaq xeyli çətinləşib, sektorda beyin axını ən yüksək həddə çatıb.KONKRET.az

Belə olan halda düşünürəm ki, bu tip spontan addımlar doğru deyil və ciddi narahatlıq yaradır.

Bildiyim qədər, Fərid Osmanovun İRİA-ya yeni rəhbər təyinatının da bir ili tamam olub.

Amma rəqəmsal transformasiyada, rəqəmsal hökumət quruculuğunda müəyyən irəliləyişlər olsa da, hələlik innovasiya və startap ekosistemində durğunluq davam edir, ciddi irəliləyişlər yoxdur. Vençur siyasəti düzgün qurulmayıb, vençur maliyyələşmə prinsipini “dostluq” prinsipi əvəzləyib.

Sonuncu dəfə bu qurumun hansısa bir uşaq oyuncağı resursuna – YouTube səhifəsinə investisiya ayırmasından sonra artıq biz bu qurumdan tam əlimizi üzmüşük.

Texnopark və İKT güzəştləri ilə bağlı Prezidentin məlum sərəncamı da İRİA tərəfindən qüsurlu icra olunduğundan, güzəşt əldə edən nəhəng şirkətlərin ekosistemə heç bir qatqısı olmadığından ciddi irəliləyiş hiss olunmayıb.

Əgər qurumda davamlı olaraq komanda dağılır, peşəkarlar ayrılır, amma paralel olaraq ölçülə bilən nəticələr görünmürsə, demək nələrsə düz getmir.

Bu artıq təkcə kadr məsələsi deyil — strateji fokus, idarəetmə modeli və prioritetlər məsələsidir.

İRİA ölkənin innovasiya siyasətində əsas qurumlardan biri olmalıdır. Ona görə də burada baş verənlər təkcə bir idarədaxili proses deyil, bütövlükdə ölkənin gələcək texnoloji inkişaf tempinə təsir edən məsələdir.

Ümid edirəm, qərar qəbul edənlər də baş verənlərin fərqindədir.

Həmçinin oxuyun