Azərbaycanda minimum əməkhaqqı ilə bağlı MƏQAMLAR — İqtisadçıdan AÇIQLAMA  

Azərbaycan Prezidenti İlham Əliyev BMT-nin Asiya və Sakit Okean üzrə İqtisadi və Sosial Komissiyasının 82-ci sessiyasının iştirakçılarına müraciətində ölkənin son 20 ildə keçdiyi iqtisadi inkişaf yolunun mühüm göstəricilərini açıqlayıb. Dövlət başçısı qeyd edib ki, son iki onillikdə Azərbaycan iqtisadiyyatı təxminən 4 dəfə artıb, yoxsulluq və işsizlik isə 5% səviyyəsinə enib.

Sözügedən artımın daxili dinamikası və sosial təsirləri ilə bağlı Oxu24.com-a danışan iqtisadçı Asif İbrahimov rəqəmlərin arxasındakı əsas faktorları və mövcud çağırışları təhlil edib.

Ekspert bildirib ki, son 20 ildə baş verən ciddi genişlənmənin bir neçə sütunu var. Onun sözlərinə görə, artımın əsas lokomotivi enerji sektorudur:

"Bu artımın əsas mənbəyi ilk növbədə neft-qaz sektoru olub. Enerji ixracından əldə olunan gəlirlər iqtisadiyyatın sürətli böyüməsinə təkan verib. Paralel olaraq, dövlət investisiyaları hesabına həyata keçirilən irimiqyaslı infrastruktur layihələri, tikinti sektoru və xidmət sahələri də bu artıma mühüm töhfə verib”.

Asif İbrahimov qeyd edib ki, ümumi makroiqtisadi göstəricilər müsbət olsa da, inkişafın regionlar üzrə paylanmasında fərqliliklər müşahidə olunur. İqtisadi aktivliyin daha çox paytaxt mərkəzli olduğunu vurğulayan iqtisadçı, regionlarda gəlir və məşğulluq imkanlarının Bakı ilə müqayisədə məhdud qaldığını bildirib.

Asif İbrahimov sosial göstəricilərdəki disbalansa da diqqət çəkib. O, orta və minimum əməkhaqqı arasındakı nisbətin beynəlxalq praktikadan fərqləndiyini vurğulayıb:

"Beynəlxalq praktikada minimum əməkhaqqının orta aylıq əməkhaqqının ən azı 60 faizi səviyyəsində olması tövsiyə olunur. Azərbaycanda isə bu göstərici təxminən 37 faiz civarındadır. Bu isə iqtisadi artıma baxmayaraq, gəlir bölgüsündə müəyyən disbalansın qaldığını göstərir”.

İqtisadçı sonda əlavə edib ki, ölkə iqtisadiyyatı üçün növbəti mərhələdə əsas çağırış təkcə kəmiyyət artımını qorumaq deyil, həm də gəlirlərin cəmiyyətin bütün təbəqələri və regionlar arasında daha balanslı şəkildə bölüşdürülməsini təmin etməkdir.

Çimnaz Telmanqızı

Həmçinin oxuyun

Prezident İlham Əliyev sakinlərlə görüşdə nə deyib?   —  TAM MƏTN

Almaniya Trampı yola gətirməyə çalışır

Bugünkü qəzada ölən hərbçilərin FOTOSU 

Azərbaycanda ağır QƏZA: 20-yə yaxın YARALI VAR