“Azərsun Holdinq” ötən il 20%-dən çox böyüyüb - Hesabat

CƏMİYYƏT

475

07.07.2025, 11:07

“Azərsun Holdinq” MMC və onun törəmə müəssisələri ötən ili 43,97 milyon manat xalis mənfəətlə bitirib.

Oxu24.com bu barədə holdinqin maliyyə hesabatına istinadən xəbər verir. Məlumata görə, “Azərsun”un mənfəəti ötən il 24,6% və ya 14,3 mln. manat azalıb. 2023-cü ildə holdinq 58,31 mln. manat xalis mənfəət açıqlamışdı.

Bununla belə, ümumilikdə holdinqin bölüşdürülməmiş mənfəəti 10% artaraq 517,9 mln. manatdan 569,3 mln. manata yüksəlib.

Holdinqin mənfəətinin azalması əsasən ümumi gəlirlərinin azalması ilə bağlı olub. Belə ki, ümumi gəlirlər 2024-cü ildə 8,3% və ya 149,5 milyon manat azalaraq 1 milyard 661 milyon manata enib. Satışların maya dəyəri isə 2023-cü ildəki 1 milyard 347.7 milyon manatdan ötən il 1 milyard 213.9 milyon manata enib. Başqa sözlə, maya dəyərində 133.8 milyon manat və ya 9.93% azalma müşahidə edilib. Bununla da, mənfəət 447.4 milyon manat olub ki, bu da əvvəlki ilə nisbətən 3.4% azdır.

Əməliyyat və digər xərclər nəzərə alınmaqla holdinqin vergidən əvvəlki mənfəət 15,5% azalaraq 73.4 milyon manata enib. 2023-cü ildə bu rəqəm 86.9 milyon manat təşkil edib.

Holdinq ümumilikdə ötən il 20%-dən çox böyüyüb. Belə ki, qrupun ümumi aktivləri 2024-cü ildə 20,5% və ya 219,5 mln. manat artaraq 1 milyard 291.1 milyon manata yüksəlib.

Bundan əlavə, ötən il holdinqin cəmi kapitalı 7,4% və ya 47 mln. manat artaraq 684,8 milyon manata, cəmi öhdəlikləri isə 39,7% və ya 172,4 mln. manat artaraq 606,3 milyon manata çatıb.

Həmçinin oxuyun