Uşaqlarda balıq yağı qəbulu nə vaxt lazımdır? Həkim AÇIQLADI

TİBB

526

01.07.2026, 16:00

Uşaqların sağlam böyüməsi və inkişafı üçün düzgün qidalanma əsas şərtlərdən biridir. Xüsusilə beyin, sinir sistemi və görmə funksiyalarının normal formalaşması üçün bəzi qida maddələrinin orqanizmə kifayət qədər daxil olması olduqca vacibdir.

Pediatr Elşən Tağıyev Oxu24.com-a açıqlamasında bildirib ki, uşağın gündəlik qida rasionunda balıq və dəniz məhsulları kifayət qədər yer almırsa, bu zaman balıq yağı əlavələrinin qəbulu nəzərdən keçirilməlidir.

Həkimin sözlərinə görə, balıq yağının əsas üstünlüyü onun tərkibində olan omega-3 yağ turşularıdır. Bu maddələr insan orqanizmi tərəfindən kifayət qədər sintez olunmadığı üçün qida vasitəsilə qəbul edilməlidir.

“Omega-3 yağ turşuları arasında ən mühüm komponentlərdən biri DHA, yəni dokozaheksaenoik turşudur. Məhz DHA uşaqların beyin inkişafı, yaddaş funksiyalarının formalaşması, diqqət və öyrənmə qabiliyyətinin yüksəlməsi, həmçinin görmə sisteminin sağlam fəaliyyəti üçün böyük əhəmiyyət daşıyır”, – deyə pediatr qeyd edib.

Mütəxəssis vurğulayıb ki, həyatın ilk illərində beyin sürətlə inkişaf edir və bu dövrdə orqanizmin DHA-ya olan tələbatı xüsusilə artır. Buna görə də valideynlər uşaqların qidalanmasına diqqət yetirməli, onların həftə ərzində kifayət qədər balıq məhsulları qəbul edib-etmədiyini nəzarətdə saxlamalıdırlar.

Elşən Tağıyevin sözlərinə görə, əgər uşaq balıq yeməyi sevmirsə və ya rasionunda bu məhsullar azdırsa, pediatr məsləhəti ilə uyğun balıq yağı preparatlarından istifadə edilə bilər.

“Lakin burada bir məqam çox vacibdir. Uşaqlar üçün nəzərdə tutulan balıq yağlarının tərkibində DHA miqdarı üstünlük təşkil etməlidir. Çünki əsas məqsəd məhz uşağın beyin və görmə inkişafını dəstəkləməkdir”, – deyə həkim bildirib.

Pediatr müxtəlif yaş qrupları üzrə DHA qəbulunun tövsiyə olunan miqdarlarını da açıqlayıb.

Belə ki, 1 yaşdan 3 yaşadək uşaqların gündəlik qəbul etdiyi balıq yağında təxminən 200 milliqram DHA olmalıdır.

3 yaşdan 8 yaşadək uşaqlar üçün bu göstərici 200–250 milliqram arasında dəyişir.

9 yaşdan yuxarı uşaqlarda isə gündəlik DHA ehtiyacı daha da artır və qəbul edilən balıq yağının tərkibində 250–500 milliqram DHA-nın olması tövsiyə edilir.

Mütəxəssis qeyd edib ki, balıq yağının faydaları yalnız beyin inkişafı ilə məhdudlaşmır. Omega-3 yağ turşuları uşaqların immun sisteminin möhkəmlənməsinə, ürək-damar sağlamlığının qorunmasına və iltihabi proseslərin azalmasına da müsbət təsir göstərir.

Araşdırmalar göstərir ki, kifayət qədər omega-3 qəbul edən uşaqlarda diqqət toplama qabiliyyəti daha yüksək olur, öyrənmə prosesləri daha effektiv keçir və görmə funksiyalarında problemlərin yaranma ehtimalı azalır.

Bununla yanaşı, həkim valideynlərə xəbərdarlıq edib ki, balıq yağı preparatlarının istifadəsi mütləq həkim nəzarəti altında həyata keçirilməlidir.

“Valideynlər özbaşına yüksək dozada balıq yağı verməməlidirlər. Uşağın yaşı, çəkisi, qidalanma xüsusiyyətləri və ümumi sağlamlıq vəziyyəti nəzərə alınaraq düzgün seçim edilməlidir”, – deyə Elşən Tağıyev vurğulayıb.

Pediatrın sözlərinə görə, ən ideal variant uşağın həftədə ən azı iki dəfə təbii balıq məhsulları qəbul etməsidir. Lakin bu mümkün olmadıqda, keyfiyyətli və uşaqlar üçün xüsusi hazırlanmış balıq yağı preparatları yaxşı alternativ hesab olunur.

Nəticə etibarilə, balıq yağı uşaqların sağlam böyüməsi, beyin və görmə funksiyalarının düzgün inkişafı üçün mühüm rol oynayır və düzgün dozada istifadə edildikdə onların gələcək sağlamlığına əhəmiyyətli töhfə verir.

Jalə

Həmçinin oxuyun