Uşaqları bu səsləri çıxaran valideynlər diqqətli olsunlar!

TİBB

674

19.01.2026, 23:54

Son zamanlar bəzi valideynlər övladlarında səbəbi aydın olmayan qəribə səslərin meydana çıxmasından narahat olduqlarını bildirirlər. Uşaqlarda boğazda və ya burunda nəsə qalmış kimi səslər çıxarma, tez-tez fınxırma və davamlı öskürək halları müşahidə olunur. Valideynlər bu şikayətlərlə uşaqları dəfələrlə LOR həkimlərinə aparsalar da, müayinələr zamanı boğaz və tənəffüs yollarında hər hansı problem aşkar edilmir.

Nevroloq Röyanə Quluzadənin Oxu24.com-a verdiyi məlumata görə, bu cür əlamətlər əksər hallarda nevroloji mənşəli ola bilər. Uşağın qeyri-ixtiyari şəkildə müxtəlif səslər çıxarması, tez-tez öskürməsi, burun səsləri çıxarması vokal tik adlanan tik pozuntusunun əlamətləri hesab olunur. Daha ağır hallarda isə uşağın istəmədən nalayiq sözlər tələffüz etməsi müşahidə oluna bilər ki, bu hal tibbdə koprolaliya adlanır.

Əgər vokal tiklərlə yanaşı motor tiklər — çiyin atma, boynu fırlatma, tez-tez göz qırpma, burnunu büzüşdürmə kimi hərəkətlər — də müşahidə edilirsə və eyni zamanda uşağın davranışlarında hiperaktivlik, diqqətsizlik, əsəbilik və aqressiya kimi dəyişikliklər varsa, bu zaman Turet sindromu ehtimalı nəzərdən keçirilir.

Qeyd olunur ki, Turet sindromu tik pozuntularının daha ağır və xroniki formasıdır. Lakin xəstəliyin vaxtında aşkarlanması və düzgün müalicə tədbirlərinin görülməsi onun ağırlaşmasının və proqressiv inkişafının qarşısını almağa imkan verir.

Mütəxəssislər valideynlərə bu cür hallarla qarşılaşdıqda uşağı mütləq nevroloq müayinəsinə aparmağı tövsiyə edirlər.

Şahbaz

Həmçinin oxuyun