Gecə yuxuda gəzən uşaqlarla bağlı valideynlərə XƏBƏRDARLIQ

TİBB

591

19.01.2026, 23:47

Bəzi valideynlər övladlarının gecə yuxu zamanı qəfil ayağa qalxaraq gəzməsindən, hətta bəzən qapını açıb evdən çölə çıxmasından narahat olduqlarını bildirirlər.

Nevroloq Röyanə Quluzadənin Oxu24.com-a verdiyi məlumata görə, bu hal tibbdə gecə yuxuda gəzmə kimi tanınır və elmi adı somnambulizmdir.

Somnambulizm daha çox uşaqlıq və yeniyetmə dövründə müşahidə olunur. Bu vəziyyət əsasən yuxunun non-REM, yəni dərin və yavaş fazasında baş verən yuxu pozuntularına aid edilir. Belə hallarda insanın gözləri açıq olsa da, şüuru tam aydın olmur və o, əslində yuxulu vəziyyətdə qalır.

Mütəxəssislər bildirirlər ki, somnambulizmin bir neçə əsas səbəbi mövcuddur. Ən önəmli amillərdən biri irsi meyillikdir. Ailə üzvlərində gecə yuxuda gəzmə halları müşahidə olunubsa, bu risk uşaqlarda da arta bilər. Digər mühüm səbəblərdən biri isə yuxu apnoesidir. Burun və boğaz badamcıqlarının böyüməsi, allergik və ya iltihabi səbəblər nəticəsində gecə boğulma və güclü xoruldama yaşayan şəxslərdə dərin yuxu fazasında ayağa qalxma, gəzmə və müxtəlif hərəkətlər etmə halları qeydə alınır.

Bundan başqa, stress, emosional gərginlik, narahatlıq, əsəbilik və depressiya da somnambulizmin yaranmasına və ya şiddətlənməsinə təsir edən amillər sırasındadır. Xüsusilə irsi meyilliyi olan və nevrotik pozuntular yaşayan insanlarda gecə yuxuda gəzmə halları daha tez-tez rast gəlinir.

Qeyd olunur ki, əgər yuxuda gəzmə halları stress, psixoloji gərginlik və ya yuxu apnoesi ilə müşayiət olunursa, bu problemlərin müalicəsi somnambulizmin azalmasına və bəzi hallarda tam aradan qalxmasına səbəb ola bilər. Mütəxəssislər valideynlərə bu cür hallar müşahidə edildikdə uşağı mütləq müvafiq tibbi müayinədən keçirməyi tövsiyə edirlər.

Hazırladı: Şahbaz

Həmçinin oxuyun