Oğurluq və soyğunçuluq arasındakı fərq nədir? - Vəkil 500 manatlıq həddi izah etdi  

Cəmiyyətdə mülkiyyət əleyhinə olan cinayətlərlə bağlı hüquqi maarifləndirmənin aparılması böyük əhəmiyyət kəsb edir. Çünki bir çox vətəndaşlar oğurluq, soyğunçuluq və dələduzluq kimi əməllərin hüquqi fərqlərini dəqiq bilmirlər. Bu hal isə zərərçəkən şəxslərin hüquqlarının qorunmasında və ya əmələ düzgün hüquqi qiymət verilməsində müəyyən çətinliklər yaradır. Qanunvericilikdə hər bir cinayət tərkibi üçün xüsusi hədlər və fərqləndirici əlamətlər müəyyən olunub. Xüsusilə də dəyən zərərin məbləği əməlin inzibati xəta və ya cinayət hesab olunmasında həlledici rol oynayır. Vətəndaşların bu incəlikləri bilməsi gələcəkdə qarşılaşa biləcəkləri hüquqi problemlərin həllini asanlaşdırır. Məsələ ilə bağlı Ali Məhkəmənin Plenum qərarlarında da aydın izahlar öz əksini tapmışdır. Hüquq-mühafizə təcrübəsində geniş rast gəlinən bu mövzu yenidən gündəmə gətirilib.

Mövzu ilə bağlı Oxu24.com-a vəkil Xəyalə Cəfərova məsələnin hüquqi tərəflərini şərh edib.

Vəkil bildirib ki, oğurluq və soyğunçuluq cinayətləri özgənin əmlakını hüquqa zidd olaraq mənimsəmək xarakteri daşısa da, onların başvermə üsulunda ciddi fərqlər var:

"Oğurluq – törədən şəxsin öz əməlinin gizli olduğunu dərk etməsi ilə baş verir. Yəni şəxs kənar şəxslərin və ya mülkiyyətçinin yanında əmlakı götürərkən bunun gizli qaldığını düşünürsə, bu əməl oğurluq sayılır. Soyğunçuluq isə əmlakın mülkiyyətçinin və ya başqalarının gözü qarşısında açıq-aşkar talanmasıdır”.

X. Cəfərova vurğulayıb ki, qanunvericilikdə zərərin məbləğinə görə məsuliyyət növləri fərqlənir:

•500 manatlıq hədd: Sadə oğurluq və soyğunçuluq hallarında vurulan zərər 500 manatdan aşağı olduqda bu əməl cinayət deyil, xırda talama hesab olunur və inzibati xəta tərkibi yaradır. Zərərin məbləği 500 manatdan yuxarı olduqda isə artıq cinayət məsuliyyəti yaranır.

•100 manatlıq ağırlaşdırıcı hal: Cinayət Məcəlləsinin 177-ci (Oğurluq) və 180-ci (Soyğunçuluq) maddələrinə əsasən, əgər əməl binaya, saxlanma yerinə gizli daxil olmaqla, elektron daşıyıcılardan, qaz, elektrik, neft kəmərlərindən istifadə etməklə, təkrarən və ya bir qrup şəxs tərəfindən törədilərsə, məbləğ 100 manatdan artıq olduqda belə xırda talama deyil, birbaşa cinayət kimi

 qiymətləndirilir.

Sonda vəkil vatandaşları hüquqi savadlılıqlarını artırmağa çağıraraq qeyd edib ki, oxşar hallarla qarşılaşan şəxslər baş verən əməlin oğurluq, soyğunçuluq və ya xırda talama olduğunu düzgün fərqləndirməyi bacarmalıdırlar.

Həmçinin oxuyun

Bakıda yaşayanlara mühüm xəbər:Hansı dəyişiklik OLACAQ?

Yüksək vəzifəyə təyinat aldı  —  ƏMR İMZALANDI

Milli Hidrometeorologiya Xidməti xəbərdarlıq yaydı: 40 dərəcə isti olacaq

Elgiz Əkbər açıqladı: Yeni layihə gəlir -VİDEO