ABŞ-də ŞOK: Məxfi sənədlər üzə çıxdı - Tramp GEDİR?

DÜNYA

28.05.2026, 12:16

ABŞ-da Donald Tramp administrasiyasının Mayamidəki federal prokurorlara Venesuelanın müvəqqəti prezidenti Delsi Rodrigesə qarşı aparılan cinayət araşdırmalarını təcili olaraq dayandırmaq barədə gizli tapşırıq verməsi geosiyasi maraqların hüquqi prinsipləri necə üstələdiyini növbəti dəfə nümayiş etdirir. "Associated Press" (AP) agentliyinin yaydığı sensasiyalı məlumatlar göstərir ki, Vaşinqton Nikolaus Maduronun devrilməsindən sonra Karakasdakı yeni rəhbərliklə münasibətləri nizamlamaq və ölkədəki daxili vəziyyəti sabitləşdirmək üçün rəsmi ittihamları arxa plana keçirməyə hazırdır. Baxmayaraq ki, ABŞ Ədliyyə Nazirliyi bu iddiaları rəsmən təkzib edir, Narkotiklərlə Mübarizə İdarəsinin (DEA) məxfi sənədləri Delsi Rodrigesin 2018-ci ildən bəri çirkli pulların yuyulması, qanunsuz qızıl qaçaqmalçılığı və narkotik ticarəti kimi ağır cinayətlərdə şübhəli bilindiyini ortaya qoyur. Bu addım ABŞ-ın Latın Amerikası siyasətindəki kəskin və pragmatik dönüşün real göstəricisidir və böyük dövlətlərin strateji məqsədlər naminə ən ciddi hüquqi işləri belə dondura biləcəyini təsdiqləyir.

Oxu24.com xəbər verir ki,məsələ ilə bağlı NOCOMMENT.az-a danışan siyasi ekspert Heydər Oğuz qeyd edib ki, ABŞ xarici siyasətində və xüsusən Tramp administrasiyasının idarəçilik sistemində geosiyasi maraqlar hər zaman konvensional hüquq normalarından daha üstün mövqedə dayanıb: "Delsi Rodrigesə qarşı aparılan araşdırmaların dondurulması Vaşinqtonun Venesuelada nəzarəti tam ələ almaq və yeni hakimiyyətlə kompromis tapmaq istəyindən xəbər verir. Maduro rejiminin çökməsindən sonra ABŞ-ın bölgədəki əsas hədəfi neftlə zəngin olan bu ölkədə sabitliyi təmin etmək və Rusiyanın, yaxud Çinin oradakı təsir imkanlarını sıfırlamaqdır. Bunu etmək üçün isə hazırkı keçid fiqurları ilə dil tapmaq mütləq şərtdir, hətta həmin fiqurların adı keçmişdə ağır cinayətlərdə və qaçaqmalçılıqda hallansa belə".

Onun sözlərinə görə, bu hadisə həm də ABŞ-ın daxili güc strukturları ilə Ağ Ev arasında gizli bir xətt qovğasının olduğunu və regional layihələrin gələcəyinin bu danışıqlardan asılı olacağını göstərir: "DEA kimi xüsusi xidmət orqanlarının sənədlərinin mətbuata sızması daxili strukturların Trampın bu praqmatik gedişinə qarşı gizli müqavimətidir. Lakin Ağ Ev Venesuelanı tamamilə itirməmək üçün Rodriges barəsindəki ittihamları bir növ diplomatik ticarət alətinə çevirib və Karakasdan istədiyi güzəştləri alana qədər bu cinayət işlərini masada saxlamağa davam edəcək. Bu baxımdan, böyük güclərin apardığı qlobal geosiyasi mübarizədə hüquq və ədalət prinsipləri hər zaman siyasi konyunkturaya qurban verilir".

Həmçinin oxuyun