Maaşınızın ən azı 50 faizi qədər əlavə ödəniş ala bilərsiniz – Bu halda 

İş yerində bir əməkdaşın olmaması və ya hansısa vəzifənin boş qalması bəzən onun işlərinin digər əməkdaşa həvalə edilməsi ilə nəticələnir. Belə vəziyyətdə isə işçinin qarşısına sadə sual çıxır: öz işimdən əlavə başqa vəzifənin də işini görürəmsə, buna görə ayrıca pul almalıyam?

Əmək Məcəlləsində bu məsələyə dair konkret qaydalar var. Qanun işçinin razılığı olmadan ona əlavə əmək funksiyasının verilməsinə imkan vermir və müəyyən hallarda əlavə ödəniş tələb edir.

Məcəlləyə əsasən, iş yerində olmayan əməkdaşın əmək funksiyasının başqa işçiyə həvalə edilməsinə tərəflərin razılığı ilə yol verilir. Belə halda əməkhaqqının ödənilməsi Əmək Məcəlləsinin 162-ci maddəsində nəzərdə tutulan qaydada həyata keçirilir.

Qanunun 61-ci maddəsinin 2-ci hissəsinə əsasən, işçi eyni vaxtda həm öz vəzifəsinin, həm də əvəz etdiyi vakant vəzifənin funksiyalarını yerinə yetirirsə, ona əlavə əməkhaqqı ödənilməlidir. Bu əlavə ödəniş vakant vəzifə üçün nəzərdə tutulmuş əməkhaqqının ən azı 50 faizi qədər olmalıdır. Məsələn, vakant vəzifənin maaşı 1000 manatdırsa və işçi həmin vəzifənin işini də öz vəzifəsi ilə yanaşı yerinə yetirirsə, ona bu işə görə ən azı 500 manat əlavə ödəniş nəzərdə tutulmalıdır.

Əmək Məcəlləsi vakant vəzifə üzrə əmək funksiyasının işçiyə 3 aydan çox olmayan müddətə həvalə edilməsinə imkan verir. 3 ay başa çatdıqdan sonra isə bir neçə variant mümkündür: işçinin razılığı ilə həmin vəzifəyə keçirilməsi, iki vəzifənin birləşdirilməsi və bununla bağlı yeni əmək müqaviləsinin bağlanması və ya vakant yerə yeni işçinin qəbul edilməsi.

Qanunda başqa bir hal da nəzərdə tutulur. Əgər vakant vəzifənin işi işçinin hazırkı vəzifəsi ilə eyni xarakter daşıyırsa, işçi öz vəzifəsində qalmaqla həmin vakant vəzifəyə də təyin edilə bilər. Bu halda da ona vakant vəzifə üzrə əməkhaqqının ən azı yarısı qədər əlavə ödəniş verilməlidir.

Beləliklə, Əmək Məcəlləsinin 61-ci maddəsi işçinin başqa əmək funksiyasını yerinə yetirməsi zamanı həm onun razılığını, həm də əlavə əməyinə görə əlavə ödənişi nəzərdə tutur.(banker.az)

Həmçinin oxuyun

Ali Baş Komandan,polis,hərbçi və Xalqın birgə yazdığı tarix — 20 sentyabr 2023-cü ilin tarixçəsi  

Azərbaycanın yeni paytaxtı bu şəhər olacaq? - SÜRPRİZ 

Maaşınızın ən azı 50 faizi qədər əlavə ödəniş ala bilərsiniz – Bu halda 

Bakı və rayonlarla bağlı xəbərdarlıq  — 21 sentyabrda...