Azərbaycanda turistlərin qalma müddəti necə artırıla bilər? – Ekspertdən AÇIQLAMA  

Son illərdə Azərbaycanın turizm sektoru sürətlə inkişaf etsə də, ölkəyə gələn xarici qonaqların ortalama qalma müddətinin azlığı əsas problemlərdən biri kimi qalmaqdadır. Çox vaxt xarici turistlər səfərlərini yalnız Bakı ilə məhdudlaşdırır və ölkəni daha çox qısamüddətli və ya tranzit dayanacaq kimi dəyərləndirirlər. Zəngin turizm potensialı olmasına baxmayaraq, regionların vahid marşrutlara tam inteqrasiya olunmaması və mövsümilik amili turistlərin ölkədə daha uzun müddət qalmasına mane olur. 2025-ci ildə ölkəyə 2,57 milyondan çox səfərin qeydə alınması böyük maraqdan xəbər versə də, artıq növbəti mərhələdə əsas hədəf kəmiyyət göstəricilərindən keyfiyyətə keçməkdir. Yəni diqqət yalnız gələn turist sayına deyil, onların ölkədə keçirdiyi gecələrin və xərclədiyi vəsaitin artırılmasına yönəldilməlidir. Bəs xarici turistlərin Azərbaycanda qalma müddətini uzatmaq və ölkəni son dayanacağa çevirmək üçün nə çatışmır?

Mövzu ilə bağlı Oxu24.com-a açıqlama verən turizm məsələləri üzrə ekspert Rəhman Quliyev bildiri ki, turistin ölkədə daha uzun müddət qalması üçün Bakıdan kənarda da rəqabət qabiliyyətli turizm məhsulları və hazır marşrutlar daha geniş təqdim olunmalıdır:

"Hazırda turistlərin əhəmiyyətli hissəsi səfərini Bakı ilə məhdudlaşdırır və bu da onların ölkədə qalma müddətinə birbaşa təsir edir. Halbuki Şəki, Qəbələ, Quba, Şamaxı, Qarabağ və Şərqi Zəngəzur kimi istiqamətlərin vahid 5-7 günlük turizm paketlərinə çevrilməsi böyük imkan yarada bilər”.

Digər mühüm məsələnin mövsümilik olduğunu qeyd edən ekspert vurğulayıb ki, turist yalnız yayda deyil, qışda da sağlamlıq, qastronomiya, ekoturizm və mədəni turizm məqsədilə də Azərbaycana gəlməlidir. Bunun üçün sadəcə görməli yerləri tanıtmaq kifayət deyil, turistə “Azərbaycanda 3 gün deyil, 7 gün niyə qalmalıyam?” sualının konkret cavabı verilməlidir. Nəqliyyat əlçatanlığı, regionlararası logistika, xidmət keyfiyyəti və qiymətlərin turist üçün proqnozlaşdırıla bilən olması da bu baxımdan mühüm amillərdir. 

Son olaraq Rəhman Quliyev əlavə edib ki, Azərbaycanın turizm potensialı kifayət qədər genişdir. Növbəti mərhələdə əsas hədəf turist sayından çox, turistin ölkədə keçirdiyi gecələrin və xərclədiyi vəsaitin artırılması olmalıdır.

Çimnaz Telmanqızı

Həmçinin oxuyun

TƏCİLİ! Avtomobil aşaraq yanıb, ölən və xəsarət alan var

Coşqun və Ucalın ölümünün şok detalları:200-300 metr aralı olublar -VİDEO

Bu şəxslərə əmək pensiyası xüsusi qaydada təyin olunur – AÇIQLAMA 

Qadınların 55 yaşında pensiyaya çıxması ilə bağlı AÇIQLAMA